АҚШ президенти Дональд Трамп Украинада тинчлик келишувини амалга ошириш учун янги қисқартирилган муддатни белгилаётганини маълум қилди. Унинг сўзларига кўра, аввал белгиланган 50 кунлик муҳлат энди 10-12 кунга туширилган.

Трамп, Буюк Британия Бош вазири Кир Стармер билан учрашув арафасида журналистлар саволларига жавоб бераркан, Россия етакчиси Владимир Путинга нисбатан ҳафсаласи пир бўлганини таъкидлади.

– Биз бу масала ечилди, деб ўйлагандик, аммо РФ Киев томон яна ракета учиришни давом эттирмоқда, -деди у. – Оқибатда қариялар уйида ва бошқа ҳудудларда кўплаб одамлар ҳалок бўлган.

Шунингдек, Трамп Россияга берган 50 кунлик муддатни қисқартиришга қарор қилганини айтди.

– Нима бўлиши маълум бўлиб қолди. Шу боис узоқ кутишдан фойда йўқ деб ўйлайман. Энди 10 ёки 12 кун билан чекланаман. Чунки кутишдан ҳеч қандай маъно кўрмаяпман, -деди у қатъий оҳангда.

Аввалроқ, Трамп агар 50 кун ичида Украинада ўт очишни тўхтатиш бўйича келишувга эришилмаса, Россия билан савдо қилувчи мамлакатларга нисбатан юқори божлар жорий этилиши ҳақида огоҳлантирган эди.

Стармер билан учрашув пайтида Трамп фақатгина Россия томонидан хафалигини эмас, балки Исроилни ҳам танқид қилган. Ғазо секторидаги вазиятни муҳокама қила туриб, у ерда ҳақиқий очарчилик бошланганини айтган.

БМТ ва бир қатор нодавлат ташкилотлар ҳам Ғазодаги болалар ўртасида тўйиб овқатланмаслик даражаси кескин ошиб бораётганини ва ҳудудда кенг кўламли очарчилик хавфи ортиб бораётганини маълум қилган.

К.Бекжонов, ЎзА