Туркия ташқи ишлар вазири Хоқон Фиданнинг айтишича, Истанбулдаги музокараларда Россия ва Украина делегациялари умумий келишувга эришиш истагида, музокаралар шу суръатда давом этса, яқин келажакда можарога вақтинчалик ечим топиш мумкин бўлади.

Унинг сўзларига кўра, делегациялар мамлакатлар етакчиларининг учрашуви зарурлиги бўйича “фундаментал келишув”га эришган, бироқ Россия ҳам, Украина ҳам бу масалага турли позициялардан ёндашади.

– Гарчи ҳозирда мунозаралар бироз суст кечаётган бўлса-да, мен уларнинг умумий келишувга эришиш истагини кўрмоқдаман, – деди Фидан “NTV” телеканалига берган интервьюсида.

Аввалроқ, украин мулозими Рустам Умеров Украина раҳбари Владимир Зеленский ва РФ президенти Владимир Путин ўртасидаги учрашувни август ойи охиригача ўтказишни таклиф қилган эди. Москва эса биринчи навбатда бундай учрашув мазмунини пухта тайёрлашни талаб қилгани ҳақида хабар берганди.

Маълумот ўрнида, Россия Федерацияси ва Украина делегациялари ўртасидаги музокараларнинг учинчи раунди чоршанба куни Истанбулда бўлиб ўтди ва бир соатга яқин давом этди.

С.Раҳимов, ЎзА