Қонун лойиҳасига шарҳ

Давлат органининг ёки унинг мансабдор шахсининг қонунга хилоф қарори ёки ҳаракати ёхуд ҳаракатсизлиги туфайли етказилган зарарнинг ўрнини қоплаш соҳасидаги муносабатларни тартибга солишга қаратилган қонун лойиҳаси парламент қуйи палатаси томонидан биринчи ўқишда қабул қилинган эди. Айни пайтда қонун лойиҳаси иккинчи ўқишга тайёрланмоқда.

Унда кўзда тутилаётган нормалар ҳақида Қонунчилик палатаси депутати Гулшана Худоёрова батафсил маълумот берди:

— Бугунги кунда давлат органлари мансабдор шахсларининг қонунга хилоф қарорлари натижасида етказилган зарарни қоплаш ягона қонунчилик ҳужжати билан тартибга солинмаган. Хусусан, етказилган зарарнинг ўрнини қоплаш 10 дан ортиқ қонунлар ва қонун ости ҳужжатлари билан тартибга солинади.

Зарарларни бюджет ва бошқа манбалар ҳисобидан қоплашнинг ягона амалиёти мавжуд эмас. Амалда Тошкент шаҳрида зарарлар фуқаро (юридик шахс)ларга Компенсация жамғармалари ҳисобидан, бошқа ҳудудларда эса маҳаллий бюджет маблағларидан ундириб берилган. Шунингдек, етказилган зарарлар учун компенсация ундириш, шу жумладан зарарни қоплашнинг регресс тартиби қонун ҳужжатлари билан аниқ очиб берилмаган.

Шу мақсадда қонун лойиҳаси билан етказилган зарарнинг ўрнини компенсация қилиш, ҳудудий компенсация жамғармаси ҳисобидан қоплаб берилган маблағларни кейинчалик айбдор деб топилган давлат органининг мансабдор шахсидан тўлиқ миқдорда регресс тартибида ундириб олиш, ҳудудий компенсация жамғармаси маблағларини шакллантириш тартиби белгиланмоқда.

Қонун лойиҳасини иккинчи ўқишга тайёрлаш жараёнида депутатларимиз томонидан ишчи гуруҳимизга кўплаб таклиф ва эътирозлар келиб тушди. Республика ташкилоти ёки унинг мансабдор шахси томонидан етказилган зарарни қоплашнинг аниқ механизмларини белгилаш бўйича таклифлар билдирилди.

Таъкидлаш жоизки, кўзда тутилаётган нормалар натижасида инсон ҳуқуқлари таъминланади. Давлат органлари ва мансабдор шахслар томонидан етказилган зарар ўрни қопланади. Айбдор мансабдор шахсларни белгиланган тартибда жавобгарликка тортишга асос бўлиб хизмат қилади.

Муҳтарама Комилова ёзиб олди.

ЎзА