Сўнгги йилларда мамлакатимизнинг барча ҳудудларида бўлгани каби Қораўзак туманида ҳам тадбиркорликни ривожлантириш ва шу орқали аҳолининг иш билан бандлигини таъминлашга алоҳида эътибор қаратилиб, бу борада кўплаб ижобий ишлар амалга оширилмоқда.

Шундай тадбиркорлик субъектларидан бири сифатида «Қорақалпоғистон агрокластер» жамиятига қарашли «Қораўзак текстиль» корхонаси ҳисобланади. 2024 йилнинг август ойида ишга туширилган ушбу корхонада 150 киши иш билан таъминланиб, бугунги кунда 10 дан ортиқ турли хил болалар ва катталар учун кийим-кечаклар ишлаб чиқарилмоқда.

-Эсимўзак овул фуқаролар йиғинининг Оқпўлат қишлоғида яшайман,-дейди корхона тикувчиси Гуласен Сейдуллаева.-Ўтган йилгача уйда ишсиз ўтирдим. Кейин туманда шундай корхона очилишини эшитиб, жамият раҳбарларига мурожаат қилдим ва ишга жойлашдим. Янги корхонага ишга киргач, хорижнинг замонавий технологияларини ўзлаштириб кетиш осон бўлмади. Бу ерга келгандан сўнг тажрибали усталар ёнида юриб ўргандим ва айни пайтда ўз ишимни тўлиқ ўзлаштириб кетдим. Корхонада иш олти кун бўлиб, иш бошида тушлик ташкил этилган. Фурсатдан фойдаланиб, шундай замонавий корхоналарни ташкил этган муҳтарам Президентимизга ва республикамиз раҳбариятига катта раҳмат айтаман.

– Ушбу корхонада асосан бичилган материаллар Хоразм вилоятидан олиб келиниб, футболка, майка, пижама, боди, шорти ва бошқа кийим-кечаклар тикиб, харидорларга етказиб берилмоқда, – дейди жамият иш юритувчиси Мийригул Қодирова. -Дарҳақиқат, сўнгги йилларда юртимизга хорижий давлатларнинг замонавий техника ва технологиялари олиб келиниши билан янги корхоналар очилиб, халқимиз янги очилган иш ўринлари билан таъминланмоқда. Корхоналарда ишлаб чиқарилаётган маҳсулотлар эса ички ва ташқи бозорларда ўз харидорларини топиб, юртимиз довруғини бутун дунёга тараннум этмоқда. Бу эса ҳар биримизда ғурур-ифтихор туйғуларини уйғотади.

Адилбай Оразов,

Қорақалпоғистон ахборот агентлиги шарҳловчиси.