Андижон вилояти ҳокими Шуҳратбек Абдураҳмонов бошчилигидаги бир гуруҳ мутасаддилар ўз хизмат вазифасини ўтаётган вақтда ҳалок бўлган Хўжаобод тумани “Юксалиш” маҳалла фуқаролар йиғини ички ишлар профилактика инспектори, катта лейтенант Абдурасул Абдувалиевнинг хонадонида бўлди.

Вилоят ҳокими марҳум профилактика инспекторининг ота-онасига ҳамдардлик билдириб, унинг жамиятимизда амалга оширилаётган ислоҳотларга қўшган улкан ҳиссасини алоҳида эътироф этди. Ўзбекистон Республикаси Президентининг фармонига асосан Абдурасул Абдувалиевга вафотидан сўнг берилган “Жасорат” медали унинг оила аъзоларига топширилди.

Учрашув давомида қаҳрамоннинг юксак инсоний, касбий фазилатлари, хизмат давридаги шижоати ва мардлиги ёдга олинди. Ватан тинчлиги йўлидаги фидоийлик, бурчга садоқат марҳумнинг порлоқ хотираси ҳеч қачон унутилмаслиги таъкидланди.

Маълумот учун, Хўжаобод тумани ички ишлар бўлими Жамоат хавфсизлиги хизмати, Ҳуқуқбузарликлар профилактикаси бўлинмаси профилактика инспектори, катта лейтенант Абдурасул Абдувалиев жорий йилнинг 1 июль куни хизмат вазифасини ўташ чоғида пичоқланиб, вафот этган эди.

Ф.  Убайдуллаев, З. Умрзоқов (фото),
ЎзА мухбирлари