Арманистон Бош вазири Никол Пашинян асосий қонун қабул қилинганининг 30 йиллигига бағишланган тантанали тадбирда сўзга чиқиб, мамлакат янги конституцияга муҳтожлигини яна бир бор таъкидлади:

– Арманистон Республикасига фуқаролар овози билан маъқулланган янги конституция керак. Токи, халқ конституция ўзиники, ватани, давлатидаги ҳаёт қоидаси эканини ҳис қилсин.

1995 йил 5 июлда қабул қилинган ушбу давлат Конституциясига икки марта – 2005 ва 2015 йилларда ўзгариш киритилган. 2015 йилги ислоҳот натижасида мамлакат ярим президентлик бошқарувидан парламент бошқаруви шаклига ўтган.

2024 йил январда Пашинян “янги геосиёсий шароитда мамлакатнинг ҳаётийлигини таъминлайдиган” янги конституция зарурати ҳақида гапирганди. Кейинчалик у Қомусга асос бўлган Мустақиллик декларацияси қоидаси ортидан мамлакат уруш таҳдиди остида қолаётганини қўшимча қилган.

Маълумки, Озарбайжон мудом Қорабоғни Арманистон билан бирлаштириш тўғрисида тўғридан-тўғри чақириқ борлигини таъкидлаб, қўшни мамлакат Конституциясига ўзгариш киритишни талаб қилиб келади. Президент Илҳом Алиев фикрича, шундагина Боку ва Ереван ўртасида тинчликка эришиш мумкин.

С.Раҳимов, ЎзА