Ҳаётга татбиқ этилаётган ислоҳотлар натижасида бугун ўз бизнесини йўлга қўйиб, ўзи, оиласи, маҳалласи, эл-юрт фаровонлигига муносиб ҳисса қўшаётган тадбиркорлар сафи тобора кенгаймоқда. Юртимизда кичик бизнес ва хусусий тадбиркорлик фаолияти билан шуғулланишга қизиқиш тобора ортиб бормоқда. Айниқса, ишлаб чиқаришга бўлган талабнинг ортиб бораётгани орқали ишсиз фуқароларнинг бандлиги таъминланиб, мамлакатимиз иқтисодиётининг ривожланишига асос бўлмоқда.

Тахиатош туманидаги  «Gold sendvich» МЧЖ ташкил этилганига ҳали кўп вақт бўлгани йўқ. Пенопласт ишлаб чиқариш билан шуғулланувчи корхонада беш кишининг бандлиги таъминланган. Сўнгги пайтларда эшик орасига, уй ичига қўйишга ишлатиладиган пенопласт маҳсулотига бугунги кунда харидорларнинг талаби ортиб бормоқда.

– Бу маҳсулот билан уйни қопласа қишда иссиқ, ёзда салқин бўлади. Яъни қиш кунлари газни эллик фоизгача тежаш мумкин. Эшикнинг орасига ҳам солишда қўлланиляпти. Эшиксозлардан буюртмалар келиб тушмоқда. Иш асосан буюртма бўйича бажарилади. Яъни, хомашёни хориждан олиб келиб, уни шу ерда тайёр маҳсулот ҳолига келтирамиз. Халқимиз энди-энди бу маҳсулотнинг фойдасини тушуниб етмоқда.Ҳозирги вақтда ички бозорга маҳсулотларимизни чиқариб турган бўлсак, келгусида иш ҳажмини кенгайтириб, экспортга чиқариш ниятидамиз – дейди корхона ишчиси Ислом Байниязов.

Кичик саноат зонасига айланган корхонадан пенопласт маҳсулотини олиб, ундан замонавий усулда уй сиртини қоплаш билан шуғулланувчи тадбиркорларнинг ҳам ишлари ривожланмоқда.

– Биз «Gold sendvich» корхонасидан пенопласт маҳсулотини олиб, уй сиртини қоплайдиган устахона ташкил этганмиз. Хайтек усулида ишловчи замонавий термопанелга харидорлар талаби ортиб бормоқда. Яъни, пенопласт билан уйнинг ташқи томонини қоплаб, унинг ташқи томонини замонавий усулда безатиб чиқамиз, – дейди тумандаги устахона ишчиси Қ.Абдуллаев.

Бугун юртимизда тадбиркорлик ва ишбилармонлик соҳасига мутлақо янги муҳит, янги нафас ва янгича ёндашувлар кириб келмоқда. Тадбиркорларни қўллаб-қувватлаш борасида амалга оширилаётган кенг кўламли чора-тадбирлар уларнинг фаолият самарадорлигини оширмоқда.

Г.Турдишова, Қорақалпоғистон ахборот агентлиги

М.Ҳабибуллаевнинг олган суратлари