“Озодлик” номли эсдалик китобининг юнонча таржимаси тарғиботи тадбирида сўз олган Германия собиқ раҳбари Ангела Меркель 2017 йил март ойида ясси кабинетда бўлиб ўтган учрашувда Дональд Трамп унинг қўлини сиқишдан бош тортгани, лекин камералар йўқ пайт қўл бериб кўришганини эслади.

– Мен Дональд билан қўл бериб кўришишим керак, деб ўйлаб, хатога йўл қўйдим, у бундай қилмади, – деди Меркель. – Ўзига ҳамманинг эътиборини қаратмоқчи бўлди. У шуни хоҳлайди: ғалати қилиқлар қилади ва ҳамма қарайди. Бунинг исботини Трамп тариф сиёсати бўйича чиқараётган қарорларида ҳам кўриш мумкин.

Меркель қўшимча қилишича, европаликлар бирдам бўлиши ва Трамп блокка қўшимча тариф жорий қилса, қўрқмасдан, аксинча жавоб тарифи қўллаши керак.

– Мен АҚШ билан муносабатни узиш керак, демаяпман, – таъкидлади собиқ канцлер. – Фақат музокара олиб боришимиз кераклигини эслатяпман, холос. Ҳатто, АҚШ ҳам ёлғиз омон қололмайди.

Меркель хотира китобида Трамп ҳақида яна шундай ёзган:

– У сиёсатга тадбиркор нуқтаи назаридан баҳо берди. Ҳар қандай мулкка фақат бир марта эгалик қилиш мумкин. Агар у олмаса, бошқа биров олади. У дунё билан ҳам шундай ҳисоблашади. Трамп учун ҳамма мамлакатлар бир-бири билан доим рақобатда. Бу жараёнда бирининг муваффақияти иккинчисининг муваффақиятсизлиги. Бинобарин, ҳамкорлик орқали ҳамманинг фаровонлигини ошириш мумкинлигига ишонмайди у.

Мусулмон Зиё, ЎзА