Франция Президенти Эммануэль Макрон 2022 йил февраль ойида Россияга ташриф буюриб, ҳамкасби Владимир Путин билан учрашган. Афсуски кейинчалик ўзаро мулоқот тўхтаб қолган эди.

Кеча давлат рахбарлари сўнгги уч йил ичида биринчи бор телефон орқали гаплашди. Бу суҳбат Кремль томонидан “муҳим” дея таърифланди.

Елисей саройи ўз баёнотида мунозара икки соат давом этгани, Макрон суҳбатдошини Украинада ўт очишни тўхтатиш ва можарога барҳам бериш учун музокара бошлашга чақирганини айтди.

Путин Макронга яна бир бор Украинадаги уруш “Ғарб сиёсатининг тўғридан-тўғри таъсири, РФнинг хавфсизлик манфаатига эътибор берилмагани оқибати” эканини таъкидлади.

– Москва ва Киев ўртасидаги ҳар қандай тинчлик келишуви кенг қамровли ва узоқ муддатли хусусият касб этиши, янги ҳудудий воқеликка асосланиши керак, – дея Путиннинг сўзларидан иқтибос келтирган Кремль.

Макрон идораси Франция Президенти қўнғироқ чоғи Париж Украина суверенитети ва ҳудудий яхлитлигини сўзсиз қўллаб-қувватлаганини таъкидлади.

Мусулмон Зиё, ЎзА