Apple компанияси 2025-йилги WWDC (Worldwide Developers Conference) кўргазмасида AirPods қулоқчинлари учун сезиларли янгиланишларни эълон қилиши кутилмоқда. Янги функция ва имкониятлар қулоқчинларни янада ақлли ва кўп функцияли гаджетга айлантиради. Apple муҳандислари AirPods қулоқчинларига фойдаланувчининг уйқу ҳолатини аниқлаш имконини берувчи сунъий интеллект асосидаги технологияни жорий қилмоқдалар. Ушбу янгилик туфайли фойдаланувчи ухлаб қолганида қулоқчинлар буни аниқлайди ва мусиқани ёки аудиокитобни автоматик тарзда тўхтатади. Бу эса нафақат қулайлик, балки қувват сарфини ҳам камайтиришга хизмат қилади.
Янги функция юрак уриш ритми, ҳаракатсизлик ҳолати ва бошқа биометрик белгилар орқали фойдаланувчининг ухлаб қолганини аниқлайди. Бу имконият Apple экотизимидаги бошқа қурилмалар — масалан, iPhone ёки Apple Watch билан уйғунликда янада самарали ишлайди.
Яна бир диққатга сазовор янгилик — AirPods орқали iPhone ёки iPad камерасини бошқариш функцияси. Эндиликда фойдаланувчи AirPods оёқчасига (stem) енгил тегиниш орқали масофадан туриб суратга тушиши мумкин бўлади. Бу функция, айниқса, селфи олиш, гуруҳ билан суратга тушиш ёки штативдан фойдаланганда жуда қўл келади.
Бу каби янгиликлар Apple компаниясининг AirPods қулоқчинларини фақатгина мусиқага мўлжалланган гаджет эмас, балки фойдаланувчи ҳаётини соддалаштирадиган ақлли воситага айлантириш йўлида қадам ташлаётганини кўрсатади.
Мадинабону Насриева, Анвархўжа Аҳмедов, ЎзА