Америка Қўшма Штатларида Президент Дональд Трамп сиёсатига қарши намойишлар бўлиб ўтаётганига қарамай, 79 ёшни қарши олган Оқ уй раҳбари туғилган кунини ҳарбий парад билан нишонлади.

Шунингдек, Трамп айни шу паллада мамлакат армияси ташкил топганининг 250 йиллигига бағишланган оммавий парад ўтказди.

Бу 1991 йил АҚШ қўшини биринчи Форс кўрфази урушидан қайтгандан кейинги ғалаба парадидан сўнг энг йирик шундай маросим бўлди. Тадбирда етакчи биринчи хоним Мелания Трамп билан бирга кўриниш берган. Уларнинг ёнида Вазирлар Маҳкамасининг  бир неча аъзоси, жумладан мудофаа вазири Пит Хегсет ҳам бор эди.

Вашингтон ёдгорлиги ёнида йиғилган Президент тарафдорлари, ҳарбийлар ва уларнинг оила аъзолари “туғилган кунингиз билан, жаноб Президент”, – дея куйлаган.

Парадда 150 ҳарбий техника воситаси ва 6600 аскар иштирок этган, бир нечта тарихий уруш давридаги қуроллар намойиш қилинган.

Маросим харажати 45 миллион долларни ташкил қилган. Ушбу маблағнинг бир қисми Трамп, қолгани хайрия манбалари ҳисобидан қопланган.

Америка раҳбари армиянинг жанговар руҳи ва жасорати ҳақида мақтовга тўла нутқ сўзлаган.

                                               С.Поёнов, ЎзА