Microsoft асосчиси Билл Гейтс бойлигининг асосий қисмини кейинги 20 йил ичида Африкада соғлиқни сақлаш ва таълим хизматларини яхшилашга сарфламоқчи.

Миллиардер Эфиопия пойтахти Аддис Абебада нутқ сўзлади. У Африканинг ёш инноваторларига қитъада соғлиқни сақлашни яхшилаш учун сунъий интеллект (СИ)ни ишга солиш таклифини берган.

Гейтс жамғармасининг таъкидлашича, Африка бўйича 3 та устувор вазифа белгилаб олинган: 

1) оналар ва чақалоқлар ўлиминининг олдини олиш;

2) кейинги авлоднинг ҳалокатли юқумли касалликлардан азият чекмасдан ўсишини таъминлаш;

3) миллионлаб одамларни қашшоқликдан олиб чиқиш.

Украина делегацияси 2 июнь куни Истанбулдаги музокараларда Россия томонига 500 дан ортиқ фамилияларни ўз ичига олган қидирувдаги болалар рўйхатини топширди.

Рўйхатда 2022 йил кузида Херсон вилоятидаги болалар уйидан Қримга олиб кетилган 50 га яқин бола мавжуд. Шу болалар ичида “Адолатли Россия” партияси раҳбари Сергей Мироновнинг рафиқаси Инна Варламова томонидан олиб кетилган Илья Вашченко ва Маргарита Прокопенко ҳам бор. Оила 10 ойлик депортация қилинган қизни фарзандликка олгани айтилмоқда.

Буюк Британия армияси янги мудофаа стратегияси доирасида жанговар ҳаракатларга доимий шайлик режимига ўтмоқда. Бу ҳақда мамлакат бош вазири Кир Стармерга таяниб Euronews хабар берди.

Стармер мудофаа харажатлари режасини тақдим этган. Вазир 12 та янги сувости кемаси ва ўқ-дорилар ишлаб чиқарувчи заводлар қурилиши ҳақида ҳам гапирган.

АҚШ миграция идоралари 2025 йил 28 май куни иммиграция сиёсати ва чегара назорати бўйича киритилган ўзгартишлар ҳақида маълумот берди.

Унга мувофиқ, АҚШ иммиграция сиёсатининг устувор йўналишлари қуйидагилардан иборат:

чегарани ноқонуний кесиб ўтиш ва ноқонуний бўлиш учун жавобгарликка тортиш;

АҚШ ҳудудида жиноят содир этган чет эл фуқароларини жиноий жавобгарликка тортиш.

Америка Қўшма Штатларига қонуний равишда кирган, аммо қолиш муддатини ёки қонунларни бузган шахслар ҳибсга олиниши, жаримага тортилиши, визасидан маҳрум этилиши ва депортация қилиниши мумкин. Қўшма Штатларга кириш доимий тақиқланиши мумкин.

Австралиялик 34 ёшли аёл 24 соат ичида турникда тортилиш бўйича Гиннес рекордини ўрнатди. Унинг айтишича, рекордни янгилашни унга эри ва мураббийи таклиф қилган экан. Аёлнинг сўзларига кўра, у дастлаб “бу имконсиз деб ўйлаб, кулиб юборган”. Ўша пайтдаги рекорд бир кунда 4081 марта тортилиш эди. Бу рекордни 2021 йилда польшалик Паула Горло ўрнатган.

АҚШда ишлаб чиқарилган iPhoneʼлар нархи 3500 долларгача етиши мумкин. Бу ҳақда америкалик таҳлилчи Ден Ивесга таяниб CNN хабар берди.

Таҳлилчи Wedbush Sеcurities молиявий хизматлар фирмасининг технология тадқиқотлар глобал раҳбари ҳисобланади. У iPhoneʼни АҚШда ишлаб чиқариш Осиёдаги арзон ишчи кучидан анча қимматга тушишини айтмоқда.

Унинг қўшимча қилишича, iPhone ишлаб чиқаришининг қарийб 90 фоизи Хитойда амалга оширилади. Смартфон қисмларини ишлаб чиқариш ва йиғиш ўнлаб йиллар олдин Осиёга кўчирилган. Бу ҳаракат Appleʼни дунёдаги энг қиммат компаниялардан бирига айлантиришга ва смартфонлар ишлаб чиқарувчи етакчи бўлишига олиб келган.

Ирода Жўраева, Улуғбек Тўхтаев, ЎзА