Microsoftʼtıń tiykarın salıwshısı Bill Geyts baylıǵınıń tiykarǵı bólegin keyingi 20 jıl ishinde Afrikada densawlıqtı saqlaw hám bilimlendiriw xızmetlerin jaqsılawǵa jumsawdı gózlemekte.

Milliarder Efiopiya paytaxtı Addis Abebada shıǵıp sóyledi. Ol Afrikanıń jas innovacionerlerine kontinentte densawlıqtı saqlawdı jaqsılaw ushın jasalma intellektti (JI) iske qosıwdı usınıs etken.
Geyts fondınıń atap ótiwinshe, Afrika boyınsha 3 tiykarǵı wazıypa belgilep alınǵan:
1) analar hám náresteler óliminiń aldın alıw;
2) keyingi áwladtıń qáwipli juqpalı keselliklerden azap shekpey ósiwin támiyinlew;
3) millionlaǵan adamlardı kámbaǵallıqtan alıp shıǵıw.
Ukraina delegaciyası 2-iyun kúni Stambuldaǵı sóylesiwlerde Rossiya tárepine 500 den aslam familiyalardı óz ishine alǵan izlewdegi balalar dizimin tapsırdı.
Dizimde 2022-jıldıń gúzinde Xerson wálayatındaǵı balalar úyinen Qırımǵa alıp ketilgen 50 ge shamalas bala bar. Usı balalar ishinde «Ádalatlı Rossiya» partiyası basshısı Sergey Mironovtıń ómirlik joldası Inna Varlamova tárepinen alıp ketilgen Ilya Vashchenko va Margarita Prokopenko da bar. Shańaraq 10 aylıq deportaciya etilgen qızdı perzentlikke alǵanı aytılmaqta.
Ullı Britaniya armiyası jańa qorǵanıw strategiyası sheńberinde jawıngerlik háreketlerge turaqlı tayarlıq rejimine ótpekte. Bul haqqında mámlekettiń bas ministri Kir Starmerge súyenip Euronews xabar berdi.
Starmer qorǵanıw qárejetleri rejesin usınǵan. Ministr 12 jańa suw astı kemesi hám oq-dáriler islep shıǵarıwshı zavodlar qurılısı haqqında da aytıp ótken.
AQSh migraciya uyımları 2025-jıl 28-may kúni immigraciya siyasatı hám shegara qadaǵalawı boyınsha kirgizilgen ózgerisler haqqında maǵlıwmat berdi.
Oǵan muwapıq, AQSh immigraciya siyasatınıń tiykarǵı baǵdarları tómendegilerden ibarat:
shegaranı nızamsız kesip ótiw hám nızamsız jasaw ushın juwapkershilikke tartıw;
AQSh aymaǵında jınayat islegen sırt el puqaraların jınayıy juwapkershilikke tartıw.
Amerika Qurama Shtatlarına nızamlı túrde kirgen, biraq qalıw múddetin yamasa nızamlardı buzǵan shaxslar qamaqqa alınıwı, járiymaǵa tartılıwı, vizasınan ayırılıwı hám deportaciya etiliwi múmkin. Qurama Shtatlarǵa kiriw turaqlı qadaǵan etiliwi múmkin.
Avstraliyalı 34 jasar hayal 24 saat ishinde turnikte tartılıw boyınsha Ginnes rekordın ornattı. Onıń aytıwınsha, rekordtı jańalawdı oǵan kúyewi hám trener usınıs etken eken. Hayaldıń aytıwınsha, ol dáslep «bul imkansız dep oylap, kúlip jibergen». Sol waqıttaǵı rekord bir kúnde 4081 márte tartılıw edi. Bul rekordtı 2021-jılı polshalı Paula Gorlo ornatqan.
AQShta islep shıǵarılǵan iPhoneʼlardıń bahası 3500 dollarǵa shekem jetiwi múmkin. Bul haqqında amerikalı analitik Den Iveske súyenip CNN xabar berdi.
Analitik Wedbush Securities finanslıq xızmetler firmasınıń texnologiya izertlewler global basshısı esaplanadı. Ol iPhoneʼdı AQShta islep shıǵarıw Aziyadaǵı arzan jumısshı kúshinen biraz qımbatqa túsetuǵının aytpaqta.
Onıń qosımsha etiwinshe, iPhoneʼislep shıǵarıwdıń derlik 90 procenti Qıtayda ámelge asırıladı. Smartfon bóleklerin islep shıǵarıw hám jıynaw onlaǵan jıllar aldın Aziyaǵa kóshirilgen. Bul háreket Appleʼdi dúnyadaǵı eń qımbat kompaniyalardan birine aylandırıwǵa hám smartfonlar islep shıǵarıwshı jetekshi bolıwına alıp kelgen.

Qaraqalpaqstan xabar agentligi