Буюк Британия Мудофаа вазирлиги янги қўмондонлик тузмоқда. Мазкур тузилманинг мақсади Россия билан кибер уруш олиб бориш. Бу ҳақда “Telegraph” нашри ёзган.

– Британия ҳарбийлари сунъий интеллект ва хакерлар жамоаси учун 1 миллиард фунт стерлингдан кўпроқ маблағ сарфлайди, – деган қироллик мудофаа вазири Жон Хили. – РФ каби давлатларга қарши курашиш учун кўпроқ онлайн имконият берилади.

Газета ёзишича, сунъий интеллект тизимидан фаол фойдаланадиган ҳужумкор амалиёт учун махсус янги Кибер ва Электромагнит қўмондонлик яратилмоқда. Буюк Британиянинг янги ҳужумкор кибер қобилияти тафсилоти эса сир сақланади.

– Хилининг нутқи Британия томонидан уюштирилажак тажовузкор хакерлик ҳужумларининг аниқ тасдиғи, – дея хулоса қилади нашр.

Мутахассислар таъкидлашича, сўнгги пайт хакерларнинг Россияга нисбатан фаоллиги мисли кўрилмаган даражада кучайган. Масалан, апрель ойи охирида “Солар” компаниялар гуруҳи таҳлилчилари 2025 йил биринчи чорагида маҳаллий веб-сайтларга қилинган ҳужум сони 801 миллионгача етганига эътибор қаратган. Бу ўтган йилнинг шу даврига нисбатан икки баробар кўп. Энг кўп ҳужум логистика саноати, давлат идоралари ва банк ташкилотларига йўналтирилган.

С.Раҳимов, ЎзА