Жанубий Кореяда президентни танлаш учун муддатидан олдин овоз бериш 29-30 май кунлари бўлиб ўтади. Сайловнинг асосий санаси расман 3 июнга белгиланган ва вақтинча дам олиш куни, деб эълон қилинган.

Асосий овоз бериш фақат фуқаро бириктирилган сайлов участкасида амалга оширилади.

Корея Республикасида ўтган йил 3-4 декабрь кунлари мамлакатда ҳарбий ҳолат жорий этгани муносабати билан аввалги Президент Юн Сок Ёлга якуний импичмент эълон қилингандан кейин давлатга янги раҳбар сайлаш бўйича қарор қабул қилинган.

Марказий сайлов комиссияси 28 май куни “Gallup Korea” тадқиқот институтига 24-25 май кунлари 18+ ёшдаги 1512 нафар сайловчи ўртасида сўровнома ўтказишни таклиф этди. Сўров натижасига кўра, сайловда “албатта овоз берувчи” фуқаролар улуши 86,8 фоизни ташкил этди.

KBS телеканали буюртмаси билан Корея тадқиқот институти томонидан ўтказилган ва 27 май куни кечқурун, яъни номзодларнинг якуний телебаҳсидан сўнг эълон қилинган сўров натижаси Бирлашган демократик партия номзоди Ли Чже Мён 45, Фуқаролик ҳокимияти партияси вакили Ким Мун Су 36 фоиз тахмин билан бошқа номзодлардан кўра яхши имкониятга эгалигини кўрсатган.

С.Раҳимов, ЎзА