АҚШнинг федерал суди президент Дональд Трампнинг импортга глобал тарифларни жорий этишда ўз ваколатидан ошиб кетганини аниқлади ва уларни тўхтатиш ҳақида қарор чиқарди.

Суд қарорига кўра, Трамп тарифларни жорий этиш учун асос қилиб кўрсатган қонун президентга деярли бутун дунёга бож солиш ҳуқуқини бермайди. Бошқа давлатлар билан савдони тартибга солиш бўйича мутлақ ваколатларни Конституция Конгрессга берган.

Қарор эълон қилингандан сўнг, Трамп маъмурияти апелляция шикояти киритди. Агар суд қарори апелляция инстанциясида ва эҳтимол Олий судда тасдиқланса, тарифларнинг аксарияти (барчаси эмас) тўхтатилади.