Ўзбекистон Республикаси мудофаасига кўмаклашувчи “Ватанпарвар” ташкилоти Қорақалпоғистон Республикаси кенгаши томонидан Шимоли-ғарбий ҳарбий округи билан ҳамкорликда ёшларни ватанпарварлик руҳида ва жисмоний тарбиялаш ишларини самарали ташкил этиш мақсадида ҳарбий-ватанпарварлик спартакиадаси доирасида “Ватанпарварлик – олий мақсадим!” шиори остида умумтаълим мактаблари ва касб-ҳунар таълим муассасалари ёшлари ўртасида “Шунқорлар” ҳарбий-спорт ўйинларининг Қорақалпоғистон Республикаси босқичи ўтказилди.
Мусобақада Тўрткўл, Беруний, Элликқалъа, Амударё, Қўнғирот, Хўжайли, Қораўзак, Чимбой, Кегейли туманлари ва Нукус шаҳридан 17-22 ёш оралиғидаги 10 та жамоадан жами 100 нафар ёш иштирок этди. Низом шартларига кўра, мусобақа учта блокдан иборат бўлиб, жамоалар биринчи “Ҳарбий ватанпарварлик” блогида “Ўзбекистон тарихи билимдони” викторинаси, “Биз бир жамоамиз!” кўрик-танлови, “Саф қўшиғи” танлови шартлари, иккинчи “Ҳарбий-амалий кўпкураш” блогида “Пневматик қуролдан ўқ отиш”, “Ўқув гранатасини узоқликка улоқтириш”, “Ҳарбийлаштирилган эстафета” шартлари ва учинчи “Спорт” блогида дуатлон, 100 метрга югуриш, турникда тортилиш шартлари асосида куч синашди.
Қизғин ва муросасиз кечган ҳарбий-спорт мусобақасида биринчи ўринни Қўнғирот тумани ўқув спорт- техника клуби жамоаси қўлга киритди ва жамоа Ўзбекистон Республикаси мудофаасига кўмаклашувчи «Ватанпарвар» ташкилоти Марказий кенгаши раисининг кўчма кубоги учун кечадиган беллашувда қатнашиш ҳуқуқига эга бўлди.
Иккинчи ўрин Кегейли тумани ўқув спорт- техника клуби жамоасига, учинчи ўрин эса Қораузак тумани ўқув спорт -техника клуби жамоасига насиб этди. Бундан ташқари, номинациялар бўйича ғолиблар аниқланди. “Энг моҳир мерган” номинациясига Хўжайли тумани ўқув спорт -техника клуби иштирокчиси Асадбек Султамуратов, “Энг яхши спортчи” номинацияси Тўрткўл тумани ўқув спорт -техника клуби иштирокчиси Зинура Нуратданова, “Энг яхши билимдон” номинациясига Элликқалъа тумани ўқув спорт- техника клуби иштирокчиси Сардор Генжеев сазовор бўлди.
Ғолиб ва совриндорлар “Ватанпарвар” ташкилоти томонидан диплом ва эсдалик совғалари билан тақдирланди.
Таъкидлаш жоизки, ҳозир республика миқёсида ўтказилаётган “Шунқорлар” ҳарбий-спорт ўйинлари “Ватанпарвар” ташкилотининг “Ватан тараққиётига хизмат қилиш ва содиқ бўлиш” концептуал ҳарбий-ватанпарварлик ғояси остида ёшларни бирлаштиришга яхши замин яратди. Бу эса ташкилот томонидан тайёрланаётган ватанпарвар ёшлар Янги Ўзбекистоннинг мудофаа қудратини мустаҳкамлашда ҳамда равнақ топишида салмоқли ҳисса қўшишини англатади.
Шу куни “Ватанпарвар” – менинг танловим!” шиори остида «Ватанпарвар” ташкилоти фаолияти, унинг ривожланиш йўналишлари, юртимиз ижтимоий ҳаётида тутган ўрни ҳамда амалга оширилаётган ислоҳотлар тўғрисидаги амалий ишларни шаҳар ва туманлар аҳолисига, айниқса, ёшларга етказиш, ташкилот фаолияти тўғрисида ёшлар онгида тасаввур шакллантириш ва унинг сафига кириш иштиёқини уйғотиш юзасидан ташкилотнинг замонавий енгил ва юк ўқув автомобиллари ва спортнинг техник ва амалий турлари бўйича спорт техникалари (картинг, мотоцикллар, спорт автомобили), шунингдек, ракетамодел ва корд авиамоделларининг кўргазмали намойиши ўтказилди.
Дарҳақиқат “Шунқорлар” ҳарбий-спорт ўйинлари “Ватанпарвар” ташкилоти томонидан ёшларни Ватанга садоқат ва ҳарбий-ватанпарварлик руҳида тарбиялаш йўлида амалга оширилаётган эзгу ишларининг яна бир ёрқин исботидир.
Довуд Абибуллаев, ЎзА мухбири