Миср Араб Республикасининг “Еттинчи кун” ва бошқа нашрлари мамлакат қишлоқ хўжалиги вазири Ўзбекистоннинг Қоҳирадаги элчиси билан учрашганини ёритди.
Манбага кўра, Миср қишлоқ хўжалиги ва мелиорация вазири Алаъ Фаруқ диёримизнинг Қоҳирадаги Фавқулодда ва мухтор элчиси Мансурбек Қиличев билан учрашиб, икки давлат ўртасида қишлоқ хўжалиги соҳасида ҳамкорликни кенгайтириш масалаларини муҳокама қилган.
Учрашув аввалида қишлоқ хўжалиги вазири Миср ва Ўзбекистон ўртасидаги муносабатлар чуқур экани, шунингдек, озиқ-овқат хавфсизлигига эришиш ва икки мамлакатда қишлоқ хўжалигини ривожлантириш учун ҳар томонлама ёрдам беришга тайёрлигини таъкидлади.
Фаруқ Мисрнинг бу борадаги катта тажрибаси замонавий қишлоқ хўжалиги технологияларига ҳамқадам бўлиши, қишлоқ хўжалиги ва ўсимликлар карантини бўйича сўнгги уч йил давомида тайёрланган ўзаро англашув меморандумлари имзоланганини ҳисобга олган ҳолда, икки давлат ўртасидаги илмий тадқиқотлар ва уни қўллаш бўйича қўшма ҳамкорлик қилиш имкониятларига эътибор қаратди.
Ўз навбатида, элчимиз кўплаб соҳаларда хусусан, қишлоқ хўжалигида икки томонлама ҳамкорликни кенгайтиришдан манфаатдор экани, бу ҳар икки давлат сиёсий раҳбариятининг иқтисодий соҳада айниқса, қишлоқ хўжалиги ва озиқ-овқат хавфсизлиги соҳаларида ҳамкорликка алоҳида эътибор қаратаётганини эътироф этди.
Мансурбек Қиличев пахта етиштириш технологияларида Миср тажрибасидан фойдаланиш, қатор қишлоқ хўжалиги экинлари, биринчи навбатда, картошканинг яхшиланган, серҳосил уруғларини етиштириш бўйича илмий-тадқиқот йўналишларида ҳамкорлик қилиш истаги борлигини таъкидлади.
Муҳаррама Пирматова, ЎзА