Egipet Arab Respublikasınıń “Jetinshi kún” hám basqa da basılımları mámlekettiń awıl xojalıǵı ministri Ózbekstannıń Kairdaǵı elshisi menen ushırasqanın sáwlelendirdi.
Dárekke bola, Egipet awıl xojalıǵı hám melioraciya ministri Alá Faruq elimizdiń Kairdaǵı Ayrıqsha hám tolıq huqıqlı elshisi Mansurbek Qilichev penen ushırasıp, eki mámleket arasında awıl xojalıǵı tarawında birge islesiwdi keńeytiw máselelerin dodalaǵan.
Ushırasıw aldınan awıl xojalıǵı ministri Egipet hám Ózbekstan arasındaǵı qatnasıqlar tereńleskenin, sonday-aq, azıq-awqat qáwipsizligine erisiw hám eki mámlekette awıl xojalıǵın rawajlandırıw ushın hár tárepleme járdem beriwge tayar ekenin bildirdi.
Faruq Egipettiń bul baǵdardaǵı úlken tájiriybesi zamanagóy awıl xojalıǵı texnologiyalar menen teńdey qádem taslawın, awıl xojalıǵı hám ósimlikler karantini boyınsha sońǵı úsh jıl dawamında tayarlanǵan óz-ara túsinisiw memorandumlarına qol qoyılǵanın esapqa alıp, eki mámleket arasındaǵı ilimiy izertlewler hám onı qollanıw boyınsha birge islesiw imkaniyatlarına itibar qarattı.
Óz gezeginde, elshimiz kóplegen tarawlarda, atap aytqanda, awıl xojalıǵında eki tárepleme birge islesiwdi keńeytiwden mápdar ekenin, bul eki mámleket siyasiy basshılıǵınıń ekonomikalıq tarawda, ásirese, awıl xojalıǵı hám azıq-awqat qáwipsizligi tarawlarında birge islesiwge ayrıqsha itibar qaratıp atırǵanın atap ótti.
Mansurbek Qilichev paxta jetistiriw texnologiyalarında Egipet tájiriybesinen paydalanıw, bir qatar awıl xojalıǵı eginleri, birinshi gezekte, kartoshkanıń jaqsılanǵan, zúráátli tuqımların jetistiriw boyınsha ilimiy-izertlew baǵdarlarında birge islesiw tilegi bar ekenligin bildirdi.
Muharamma Pirmatova, ÓzA