Украина президенти Владимир Зеленский Туркия пойтахти Анқарага етиб келди, деб хабар тарқатди турк матбуоти.

Зеленскийни Туркия ва Украина расмийлари аэропортда кутиб олган.

Маълумки, бундан бир неча кун аввал Россия президенти Владимир Путин Украинага 15 май куни Истанбулда ҳеч қандай шартларсиз тўғридан-тўғри музокараларни давом эттиришни таклиф қилган эди. РФ етакчиси тегишли музокаралар давомида томонлар ўт очишни тўхтатиш бўйича келишувга эришиши мумкинлигини истисно этмаган.

Россия президентининг матбуот котиби Дмитрий Песковнинг таъкидлашича, мамлакат расмийлари узоқ муддатли тинч йўл билан келишувга эришиш йўллари устида ишламоқда. Унинг сўзларига кўра, Украина билан таклиф этилаётган музокаралардан мақсад, можаронинг асл сабабларини бартараф этиш ва Россия манфаатларини таъминлашдан иборат.

Айни пайтда Туркияда Россия делегациясига президент ёрдамчиси Владимир Мединский бошчилик қилмоқда.

Дмитрий Песков “CNN” телеканали билан бўлган суҳбатда Владимир Путиннинг Украина билан Туркиядаги музокараларида иштирок этишини истисно қилди.

“Йўқ”, деб жавоб берган у Путиннинг Истанбулга келиши эҳтимоли борми, деган саволга.

Украина ва Россия ўртасида бўлиб ўтадиган музокараларга АҚШ етакчиси Дональд Трамп ҳам катта эътибор билан қараб турибди. Зеро, Қўшма Штатлар раҳбари Украина низосини ҳал қилиш ўзининг президентлик давридаги устувор вазифа эканини таъкидлаган.

– Агар керак бўлса, жума куни Туркияда Украинадаги зиддиятни ҳал қилиш бўйича музокараларга қўшилишга тайёрман, -деди у Доҳадаги бизнес раҳбарлари билан учрашувда.

С.Раҳимов, ЎзА