АҚШ Президенти Дональд Трамп Яқин Шарқ мамлакатларига ташрифи доирасида Саудия Арабистонига келди, дея хабар тарқатди “Al Arabiya” телеканали. Бу етакчининг иккинчи марта сайланганидан кейинги илк хорижий сафари. Демак, Оқ уй раҳбари биринчи чет эл ташрифи учун айнан Подшоҳликни танлаган. Телеканал таъкидлаганидек, воқеа минтақавий муаммолар авж олиб, Ар-Риёд хавфсизлик, энергетика ва терроризмга қарши кураш борасида Вашингтоннинг стратегик ҳамкори мақомини мустаҳкамлаётган бир пайтда юз бермоқда. Шу маънода ташриф чуқур сиёсий ва иқтисодий истиқболга эга. Сўнгги ўн йилликларда Американинг бир неча Президенти Саудияга келган. Трамп 13-16 май кунлари кўрфазнинг уч давлати – Саудия, Қатар ва БААда бўлади. АҚШ раҳбари маъмурияти маълум қилишича, кун тартибига хавфсизлик, сунъий интеллект, энергия ва қурол-яроқ таъминоти масалалари киритилган.

14 май куни Ар-Риёдда Кўрфаз давлатлари ҳамкорлик кенгаши раҳбарлари саммити бўлиб ўтади. Бир кун аввалга режалаштирилган кенг кўламли инвестиция форумида“Tesla” ва “SpaceX” компаниялари раҳбари Илон Маск, “Meta” бош директори Марк Цукерберг, “Citigroup” эгаси Жейн Фрейзер каби йирик тадбиркорлар қатнашиши кутиляпти. ОАВ хабарига кўра,анжуман доирасида қарийб 600 миллиард долларлик келишувлар тузилиши мумкин.

С.Раҳимов, ЎзА