Россия Президенти Владимир Путин 15 май куни Истанбулда Украина билан тўғридан-тўғри музокара ўтказишга тайёрлигини билдирди. У мулоқотни олдиндан ҳеч қандай шартсиз бошлашни таклиф қилиб, бу жараён можаронинг асл сабабини аниқлаш ва бартараф этиш, узоқ муддатли истиқболда мустаҳкам тинчлик ўрнатиш учун зарурлигини таъкидлади.

Аввалроқ Москва ўт очишни тўхтатиш бўйича келишув фақат муайян шарт, жумладан Ғарбнинг Украинага ҳарбий ёрдамини тўлиқ тўхтатиш орқали муҳокама қилиниши мумкинлигини билдирганди.

Президент Владимир Зеленский Путиннинг айни баёнотини “ҳарқалай, яхшилик аломати” дея баҳолаб, руслар ниҳоят урушни тугатиш ҳақида ўйлаётганини кўриш яхши белгилиги, дунё бу қарорни кўпдан бери кутаётганига эътибор қаратган. Унинг фикрича ҳар қандай урушни ҳақиқатан тугатиш йўлидаги илк қадам – ўт очишни тўхтатиш.

Украина раҳбари РФ 12 майдан бошлаб ўт очишни тўлиқ, узоқ муддатга ва ишончли тарзда тўхтатиши кутилаётгани, Украина эса учрашишга тайёрлигини билдирди.

Россия Ташқи ишлар вазирлиги вакили Мария Захарова бунга жавобан музокаранинг биринчи босқичида зиддиятнинг асл сабабини муҳокама қилиш талаб қилиниши, шундан сўнг ўт очишни тўхтатиш бўйича музокара бошланишини таъкидлади.

АҚШ Президенти Дональд Трамп музокара ташаббусини олқишлади: Бу Россия ва Украина учун ажойиб кун бўлиши мумкин, ярашув ҳафталиги яқин!

Франция Президенти Эммануэль Макрон Путиннинг таклифини “биринчи қадам, аммо етарли эмас” дея изоҳлаган. Халқаро экспертлар нима бўлганда ҳам, дастлабки қадам ташланди-ку, дея учрашувга катта умид боғламоқда.

Президент Режеп Таййип Эрдоған Путин билан телефон орқали суҳбатда Украина ва Россия ўртасида учрашув ташкил этиш, аввалроқ Макрон билан суҳбатда ўт очишни тўхтатиш ва мустаҳкам тинчликни таъминлашга ҳисса қўшишга тайёрлигини билдирган.

Энг муҳими Путиннинг Украина билан тўғридан-тўғри музокара ўтказиш таклифини Зеленский ва Трамп ҳам олқишлаган.

К.Бекжонов, ЎзА