Қорақалпоғистон Республикаси Ўсимликлар карантини ва ҳимояси агентлиги томонидан Ўсимликлар карантини ва ҳимояси илмий-тадқиқот институти Қорақалпоғистон Республикаси филиалида оммавий ахборот воситалари вакиллари учун пресс-тур ташкил этилди.
Ўсимликлар карантини ва ҳимояси илмий-тадқиқот институти Қорақалпоғистон Республикаси филиали Ўзбекистон Республикаси Президентининг 2021 йил 15 июлдаги “Ўзбекистон Республикаси Ўсимликлар карантини ва ҳимояси агентлигини ташкил этиш тўғрисида”ги қарори асосида ташкил этилган. Ҳозирги вақтда филиалда Қишлоқ хўжалиги экинлари ва зарарли организмларнинг дала таҳлиллари, энтомология ва биоусул ҳамда фитопатология ва гербология лабораторияларида 10 нафардан ортиқ илмий ходим фаолият олиб бормоқда.
Тадбир иштирокчилари Қорақалпоғистон қишлоқ хўжалиги ва агротехнологиялар институтининг боғида бўлиб, баҳорги қазиш ва кузатув ишлари билан танишди. Иштирокчилар зараркунандалар тарқалишини мониторинг қилиш мақсадида амалга ошириладиган феромониторинг жараёнида иштирок этиб, янги феромон тутқичлар қўйиш тадбирларини кўздан кечирди.
Филиалнинг катта илмий ходими Улуғбек Жумамуратовнинг таъкидлашича, озиқ-овқат хавфсизлигини таъминлаш, қишлоқ хўжалиги маҳсулотларини етиштиришда юқори иқтисодий самарадорликка эришиш ва деҳқончилик маданиятини ошириш учун агротехник тадбирларни ўз вақтида амалга ошириш, ўсимликларни турли зараркунанда ва касалликлардан ҳимоя қилишда илмий жиҳатдан ўрганилган тажрибаларга таянган ҳолда иш юритиш муҳим аҳамият касб этади.
Институт ўсимликлар карантини ва ҳимояси соҳасида илмий тадқиқот ишларини ва изланишларни олиб бориш, соҳани ривожлантириш бўйича узоқ муддатли стратегик йўналишларни белгилаш, республика ҳудудида иқтисодий зарар келтириши мумкин бўлган карантиндаги ва бошқа хавфли зарарли организмларнинг фитосанитар хавфи таҳлилини ўтказиш, ташқи карантиндаги ва бошқа хавфли зарарли организмларнинг кириб келишини олдини олишга қаратилган илмий асосланган фитосанитар чора-тадбирларни ишлаб чиқиш билан шуғулланади. Шунингдек, карантиндаги ва бошқа хавфли зарарли организмлар ўчоқларини аниқлаш, бартараф этиш ва улардан ҳоли бўлган ҳудудларни белгилаш, уларнинг тарқалишини олдини олиш ҳамда уларга қарши уйғунлашган кураш тизимини ишлаб чиқиш, зарарли организмларнинг қишлоқ хўжалиги экинлари ва маҳсулотларига таъсирини илмий жиҳатдан ўрганиш, уларни зарарсизлантиришнинг инновацион усулларини ишлаб чиқиш каби ишларни амалга оширади.
Маълумот учун, мамлакатимиз ҳудудида учрамайдиган карантин аҳамиятига эга 95 та зараркунанда, 17 та замбуруғли касаллик, 13 та нематода, 17 та бактериал касаллик, 32 та вирусли касаллик, 36 та бегона ўт, шунингдек, мамлакатимизнинг айрим ҳудудларида тарқалган карантин аҳамиятига эга бўлган зарарли организмлардан 8 та зараркунанда, 1 та вирусли касаллик ва 3 та бегона ўт мавжуд.
Пресс-тур давомида оммавий ахборот воситалари вакиллари лабораториялар фаолияти, касалликларнинг олдини олиш ишлари билан танишиб, мутахассислардан ўзларини қизиқтирган саволларга жавоб олди.
Довуд Абибуллаев, Мақсад Ҳабибуллаев (сурат), ЎзА.