Россияда бокс бўйича давом этаётган “Константин Коротков” халқаро турнирида чорак финал баҳслари ўз якунига етиб, бугундан ярим финал учрашувлари бошланади.

Қувонарлиси, чорак финал якунига кўра, Ўзбекистон терма жамоасининг жами 16 нафар боксчиси ғалаба қозониб, ярим финал йўлланмасини нақд қилди. Бугун бўлиб ўтадиган ярим финал жанглари орасида энг қизиқарлиси ҳамюртимиз Фарёзбек Дўсматов ва қозоғистонлик Сакен Бибосинов ўртасидаги жангдир.

Аслида икки карра Олимпия ўйинлари ғолиби Ҳасанбой Дўсматов ва қозоғистонлик Сакен Бибосинов ўртасидаги жангни мухлису-мутахассислар кутган эди. Бироқ чорак финалда ака-ука Дўсматовлар тўқнаш келгани боис, Ҳасанбой ушбу жангни ўтказишдан бош тортди ва Фарёзбекка ғалабани тақдим этди. Энди Фарёзбек акасининг азалий рақиби Сакенга қарши рингга кўтарилади. Умид қиламизки ушбу жангда чарм қўлқоп устамиз ғалаба қозонади.

Дарвоқе, мазкур босқичнинг -71 кг. вазн тоифасида Муҳаммадазизбек Исмоилов – Асилбек Абдураҳмонов жангига гувоҳ бўламиз.

Шунингдек, бугун қуйидаги боксчиларимиз рингга кўтарилади:

• -50 кг: Гулсевар Ганиева – Гулинар Турапбай (Қозоғистон);
• -57 кг: Хуморабону Мамажонова – Айдона Забунбекова (Қозоғистон);
• -60 кг: Рашида Тагирова – Рима Волосенко (Қозоғистон);
• -66 кг: Айсанем Саруарова – Сун Ҳё Ҳоанг (Шимолий Корея);
• -75 кг: Азиза Зокирова – Молка Мабрук (Тунис);
• -57 кг: Санжар Ваҳобов – Дмитрий Шиповский (Россия);
• -80 кг: Раҳматулла Бойматов – Василий Каверин (Россия);
• -60 кг: Шоҳрух Абдумаликов – Гонболд Доринямбуф (Мўғулистон);
• -63,5 кг: Абдуллоҳ Мадаминов – Жанбос Кадиралиев (Қозоғистон);
• -63,5 кг: Адҳамжон Муҳиддинов – Радна Цибиков (Россия);
• -86 кг: Шоҳжаҳон Абдуллаев – Андрей Масалов (Беларусь);
• -86 кг: Нусратбек Тоҳиров – Савелий Садома (Россия).

Жавоҳир Тошхўжаев, ЎзА мухбири