Япония НАТОнинг Украинага ҳарбий машқ ва жиҳоз етказиб бериш орқали ёрдам кўрсатиш саъй-ҳаракатида иштирок этишга тайёр, деди кун чиқар юрт мудофаа вазири Гэн Накатани ташкилот бош котиби Марк Рютте билан учрашувда.

“Киодо” агентлиги ёзишича, Накатани “Япония атрофидаги хавфсизлик билан боғлиқ вазият тобора қийинлашаётгани”ни таъкидлаган.

Учрашувда томонлар Япония – НАТО Алоҳида ҳамкорлик режаси доирасида коинот ва кибер фазо, шунингдек ёлғон маълумотга қарши кураш соҳасидаги шерикликни ривожлантириш ниятини ҳам тасдиқлаган.

Накатани билан мулоқотдан олдин Рютте Токиога қўшни Канагава префектурасидаги ўзини-ўзи мудофаа қилиш кучларига қарашли Йокосука ҳарбий-денгиз қўшини базасини кўздан кечирган. У Тайвань атрофидаги вазиятни диққат билан кузатиб бораётгани, оролда “ҳақиқатан ташвишли аломатлар бор”лигига ишонишини айтган. Шунингдек, ҳарбий саноат соҳасида НАТО – Япония ҳамкорлигини ривожлантириш истагини билдирган.

Хабарда айтилишича, Рютте бугун Бош вазир Сигэру Исиба билан учрашиши кутиляпти.