Тошкент шаҳрида Парламентлараро Иттифоқнинг 150 – юбилей ассамблеяси давом этмоқда. Эътироф этиш керакки, парламентлар билан боғлиқ бундай кенг кўламли халқаро тадбир нафақат Ўзбекистон, балки Марказий Осиё тарихида илк маротаба минтақамизда ўтказилмоқда.

Нуфузли анжуманда иштирок этаётган Жанубий Африка Республикаси (ЖАР) Провинциаллар Миллий кенгаши (юқори палатаси) раисининг ўринбосари Побалан Говендердан интервью олдик: 

– Ўзбекистонга илк бор келишим. Тўғриси, бу мамлакат ҳақида тасаввурларим бутунлай бошқача эди. Аэропортдан пойтахтингизга қўнар эканмиз, Тошкентни катта бунёдкорлик майдонига ўхшатдим. Гўзал, ораста шаҳар экан. Менга Марказий Осиёнинг пойтахтидек тасаввур уйғотди. Халқнинг юзидаги кўтаринки кайфият одамни беҳад хурсанд қилади. Бу жуда муҳим.

Парламентлараро Иттифоқнинг юбилей ассамблеяси учун айнан Ўзбекистоннинг танлангани ниҳоятда асосли, тўғри танлов эканига аминмиз. Ўзбекистон қисқа муддатда демократик ислоҳотларни жадаллик билан амалга оширган мамлакатлардан бири сифатида дунёга намоён бўлаётир. Камбағалликни қисқартириш бобидаги натижалар алоҳида таъкидлашга лойиқ. Юртингизнинг демографик динамикасини таҳлил қилиб, давлатингиз раҳбарининг ўз мамлакатини келажакка ёруғ юз билан олиб ўтиш борасидаги саъй-ҳаракатларини фақат қўллаб-қувватлаш лозим, деб ўйлайман.

Парламентлараро Иттифоқнинг юзлаб вакиллари Президент Мирзиёевнинг нутқини катта қизиқиш билан тингладик. Умуман, Ўзбекистон ташаббуси билан кун тартибига қўйилган ҳар бир масаланинг аҳамияти глобал характер касб этаётганидан хурсандмиз. Юртбошингиз ўз сўзида келажак ҳақида кўпроқ тўхталди. Дарҳақиқат, аҳолининг 60 фоизидан кўпроқ қисми ёшларни ташкил қилаётган мамлакатнинг раҳбари учун чиндан ҳам бунданда муҳимроқ масаланинг ўзи йўқ.

Анжуман ўта юқори даражада ташкил этилган. Унда қизғин муҳокамалар, фикр алмашувлар, янги ғоя ва таклифларни тинглаяпмиз. Муҳими, уларнинг барчаси битта мақсадга қаратилган – курраи заминимизни янада демократик, истиқболи баланд бўлиши, бугунги долзарб муаммоларни ҳамжиҳатликда бартараф этишга қаратилгани билан аҳамиятли.

Норгул Абдураимова,

ЎзА