Бразилияда бокс бўйича “World Boxing” ташкилоти томонидан ўтказилаётган жаҳон кубогининг иккинчи кунги беллашувлари ҳам ўз ниҳоясига етди. Қувонарлиси, ушбу кунда рингга кўтарилган уч нафар боксчимиз илк жангларини ғалаба билан якунлади.

Дастлаб, вазни -60 кг. бўлган Мадияр Данияров италиялик Мишель Бальдассини 4:1 ҳисобида мағлубиятга учратган бўлса, -50 кг. вазнда Асилбек Жалилов қозоғистонлик Нурзат Онгаровга ҳеч қандай имконият қолдирмади. Шунингдек, Акмалжон Исроилов -85 кг. вазн тоифасидаги беллашувларда швейцариялик Леонид Беришани мағлубиятга учратди.

Бугун жаҳон кубогининг учинчи кунги беллашувлари доирасида вазни -55 кг. бўлган Миразизбек Мирзахалилов ўзининг иккинчи жангини польшалик Николас Павликка қарши ўтказса, Асадхўжа Мўйдинхўжаев вазни 65 килограммгача бўлган боксчилар иштирокидаги илк беллашувда бразилиялик Юри Реис билан рақобатлашади. Ушбу ҳар икки жанг чорак финал босқичидан ўрин олган.

Жавоҳир Тошхўжаев,

ЎзА