Самарқанд шаҳрида мукофот жамғармаси 50 минг АҚШ долларини ташкил этган аёллар ўртасидаги “Women’s Chess Championship” халқаро турнири ўз ниҳоясига етди.

14 давлатнинг 150 нафарга яқин шахматчи хотин-қизлари бош соврин учун курашган турнирда ФИДЕ рейтингида 1800 дан юқори бўлганлар “А” гуруҳда, рейтинги 2000 ва ундан паст даражадагилар “Б” гуруҳда дона сурди.

Кеча халқаро турнирнинг 9-тур ўйинлари бўлиб ўтди. “А” гуруҳида етакчиликка асосий даъвогарлар Шувалова – Шухман ва Боднарук – Сливичка учрашувлари кўпчиликнинг диққат-эътиборида бўлди.

Биринчи жуфтлик баҳсида муроса йўли танланган бўлса, иккинчи жуфтлик қарама-қаршилигидаги ўйинда польшалик Алися Сливичка қора доналарда ҳаракатланишига қарамасдан рақибини таслим этишга эришди. Айнан ушбу ғалаба Сливичка турнирдаги умумий очколари сони 7,5 тага етишини ва кучлилар курашида 1-ўринни қўлга киритишини таъминлади.

Совринли ўринлар шунингдек, 7 очколи Анна Шухман, 6,5 очколи Полина Шуваловага насиб этди.

Ҳамюртимиз Умида Омонова сўнгги турда иқтидорли ёш шахматчимиз Гулдона Каримовани доғда қолдирган ҳолда 6,5 очко билан қўшимча кўрсаткичларга кўра, 5-поғонадан жой олди.

Терма жамоамиз аъзоларидан Гулдона Каримова ва Афруза Ҳамдамова 5,5 очко билан 11-12-ўринларни, Нилуфар Ёқуббоева 5,5 очко билан 16-ўринни банд этди.

Халқаро турнирнинг “Б” гуруҳида 80 нафар хотин-қиз дона сўрган бўлса, улар орасида Ўзбекистон терма жамоаси аъзоларидан Мафтуна Маматқулова 8 очко билан ғолибликни қўлга киритди.

Робияхон Сардорова 7,5 очко билан 2-ўринни, 7 очколи Шаҳина Аҳмедова 3-ўринни эгаллади. Шунингдек, 6,5 очко жамғарган иқтидорли шахматчи-қизларимиздан Малика Жумаева, Азиза Турсунова, Гулхумор Нажмитдинова, Моҳинур Ҳикматхонова каби ёшларимиз кучли ўнликни банд этишди.

Т.Рўзиев,

ЎзА