Қорақалпоғистон Республикаси прокуратураси вакиллари Хўжайли ва Тахиатош туманларидаги оилавий болалар уйида тарбияланаётган болаларнинг шароитларини ўрганди.

Ўзбекистон Республикаси Вазирлар Маҳкамасининг 2021 йил 25 октябрдаги “Етим болалар ва ота-она қарамоғидан маҳрум бўлган болаларни ижтимоий қўллаб-қувватлашга доир қўшимча чора-тадбирлар тўғрисида”ги қарори ижросини таъминлаш, уларнинг ижтимоий ҳимоясини кучайтириш, турар-жойлар билан таъминлаш, уларни оилавий болалар уйларига жойлаштириш, ҳаётга тайёрлаш учун қулай шарт-шароитлар яратиш борасида кенг кўламли ишлар амалга оширилмоқда.

Чунки етим ва ота-она қарамоғидан маҳрум бўлган болаларни ҳимоя қилиш барчамизнинг бурчимиздир. Уларнинг келажагини яхшилаш, уларни таълим ва тарбия билан қамраб олиш – бу бизнинг жамият сифатидаги масъулиятимиз.

Ташриф давомида оилавий болалар уйларининг аҳволи, болаларга яратилган шарт-шароитлар ўрганилиб, аниқланган муаммоларни ижобий ҳал қилиш бўйича мутасадди органлар раҳбарларига тегишли кўрсатмалар берилди. Шунингдек, болаларнинг маънавий-маърифий салоҳиятини шакллантириш мақсадида китоблар жамланмаси ҳамда совғалар топширилди.

Довуд Абибуллаев,

ЎзА мухбири