Россия Президенти Владимир Путин Курск вилоятидаги Украина қўшинларини қуролларни топширишга ундади, деб ёзди CNN.

Жума куни Хавфсизлик кенгаши аъзолари билан кечган учрашувда у минтақадаги Украина қўшинларини тинч аҳолига қарши жиноят содир этишда айблади. Шу билан бирга АҚШ Президенти Дональд Трампнинг ташвиши ўринли экани ҳам айтиб, таслим бўлган аскарлар ҳаёти кафолатланишини таъкидлади.

Шунингдек, РФ етакчиси ҳукумат «Американинг олдинги маъмурияти томонидан вайрон қилинган» муносабатни тиклаш устида иш олиб борилаётганини билдирди.

– Умуман, вазият ўзгара бошлади, – деди у Трамп билан муносабат ҳақида. – Келинг, бундан нима чиқишини жим кузатайлик.

Путиннинг мазкур баёноти пайшанба куни Москвада АҚШ махсус элчиси Стив Виткофф билан учрашгандан сўнг янгради. Давлат котиби Марко Рубио айтишича, бу ташриф “эҳтиёткорлик билан ўзаро ишонч сари қўйилган қадамдир”. Аввалроқ Трамп ҳам мунозара “яхши ва самарали” ўтганини қайд қилган ва “даҳшатли, қонли уруш, ниҳоят, якунланиши учун жуда яхши имконият бор”, дея қўшимча қилганди.

Трамп Путиндан Курскдаги украиналик аскарлар ҳаётини сақлаб қолишни “қаттиқ талаб қилгани”ни ҳам таъкидлади.

– Президент Трампнинг ушбу ҳарбий хизматчиларга нисбатан инсонпарварлик нуқтаи назаридан қарашга чақирганини тушунамиз,– деди Путин. – Шу муносабат билан таъкидлашни истардимки, агар қуролларини ташлаб, таслим бўлишса, уларга халқаро ҳуқуқ ва Россия Федерацияси қонунларига мувофиқ, ўринли муносабат кафолатланади. Украина армияси биринчи навбатда Курскдаги қўшинга таслим бўлиш буйруғири бериши керак.

Мусулмон Зиё, ЎзА