Осиё кураш конфедерацияси жорий йилнинг 30 июль – 5 август кунлари Жанубий Кореяда миллий спортимиз кураш бўйича ўсмирлар, ёшлар ва катталар ўртасида ўтказилиши режалаштирилган қитъа чемпионатининг рамзини эълон қилди.

Унга кўра, мусобақа рамзи Жанубий Кореянинг маданий-маърифий анъаналарини, курашнинг боқий қадриятларини ифода этган.

Мазкур қитъа чемпионати доирасида Осиё кураш конфедерацияси ижроия қўмитаси йиғилиши, конгресси, кураш ҳакамлари ва мураббийлари учун назарий ва амалий семинар машғулотлари ташкил этилиши белгиланган.

Айни кунларда Осиё мамлакатларининг бир қатор терма жамоалари сингари кураш бўйича Ўзбекистон ўсмирлар, ёшлар ва катталар терма жамоалари йилнинг энг муҳим мусобақаси бўлган қитъа чемпионатига ҳозирлик кўрмоқда.

Биринчи марта ўсмирлар, ёшлар ва катталар ўртасидаги қитъа чемпионатининг бир жойда, бир вақтда ташкил этилиши миллий спортимизнинг Осиёдаги мавқеини янада юксалтиришга, унинг оммавийлигини оширишга қаратилгани билан аҳамиятли.

Т.Рўзиев,

ЎзА