“Flightradar” хизмати маълумотига кўра, АҚШ Президенти Дональд Трампнинг Яқин Шарқ бўйича махсус элчиси Стив Уиткофф ўтирган “Gulfstream G650ER” самолёти махсус элчининг Россияга ташрифи ҳақидаги хабарлар асносида Қатардан шимолга қараб учган.

Парвоз ёзишмасида учиш ва қўниш манзили ҳақидаги маълумот мавжуд эмаслиги таъкидланган эса-да, хизмат харитасида учоқ осмонга кўтарилгач, Туркия ҳаво ҳудуди орқали шимолга қараб кетаётгани кўрсатилган.

Аввалроқ Оқ уй матбуот котиби Керолин Левитт Уиткофф Россия томонини Украина билан ўт очишни тўхтатиш бўйича келишув имзолашга кўндириш учун Москвага ташриф буюришини маълум қилганди.

– Жамоамиз жиддий ишлаяпти, – деган у “Fox News” телеканалида чиқиш қилиб. – Жаноб Уиткофф шу ҳафта Москвага боради. Умид қиламизки, улар билан келишиб оламиз.

Аввалроқ “Ахиос” портали АҚШ вакили 13 март куни Москвага боришни режалаштиргани ҳақида хабар берганди.

Маълумки, сешанба куни Украина ва АҚШ делегациялари ўртасида музокара бўлиб ўтди. Шундан сўнг Америка маъмурияти томонларни зудлик билан ўт очишни тўхтатишга чақирди. Владимир Зеленскийнинг идораси мулоқот якуни бўйича Киев ва Вашингтоннинг қўшма баёнотини эълон қилди. Яъни, Украина АҚШнинг томонлар келишуви билан узайтирилиши мумкин бўлган 30 кунлик ўт очишни тўхтатиш ҳақидаги таклифига тайёрлиги қайд этилган.

Ҳужжатда Қўшма Штатлар разведка маълумоти алмашишдаги танаффусни зудлик билан бекор қилиши ва Украинага ҳарбий юк етказиб беришни давом эттириши ҳам белгиланган.

Трамп Киев ўт очишни тўлиқ тўхтатишга тайёрлиги, Вашингтон энди Москванинг муносабатини кутаётганини таъкидлади.

Америка етакчиси можарони ҳал қилиш режасини илгари суриб, қуйидаги мазмунда баёнот берди: Тинчлик режими ўрнатилгандан сўнг тўлақонли сулҳ тузилиши ва можаро тўхтатилиши лозим. Зеленский авваллари тинчликни истамасди, энди эса рози. Қолаверса, ҳудудий масала ҳам муҳокама қилинган.

С.Раҳимов, ЎзА