Излаганга имкон кўп (+видео)
Қорақалпоқ аёл-қизлари азалдан ҳунарли, талабчан, меҳнаткаш бўлган. Губи пишиб, ёғ чиқариб, кели туйиб ундан ийжон, тақан ясаб қўй-эчкининг юнгидан урчуқ йигириб, ип чиқариб, кийим-кечаклар тўқиган. Бугун момомерос ҳунарни замонавийлик билан уйғунлаштириб келажак авлодга етказишга ҳаракат қилаётган замондошларимизнинг меҳнатларига тасаннолар айтасанг арзийди.
Шуманай туманидаги “Ойбўйир” овул фуқаролар йиғинида яшовчи Гулмира Жадигерова мамлакатимизда хотин-қизлар учун яратилган имкониятлардан унумли фойдаланиб, қисқа вақт ичида “Аёллар дафтари”дан чиқишга эришган чевар қизлардан.
Излаганга имкон кўп, деганларидек қўлидаги ҳунари, қўллаб-қувватлашлар туфайли Гулмира опа ўз ишини кенгайтиришни мақсад қилди. 2024 йил Қорақалпоғистон Республикаси Жўқорғи Кенгеси томонидан эълон қилинган грант танловида “Чевар қизнинг ҳунари” номли лойиҳаси билан қатнашиб, 100 миллион сўм ютиб олди. Берилган маблағга янги ускуналар олиб, 20 нафар қизга тикувчилик сирларини ўргатди. 5 нафар ишсиз қизнинг бандлигини таъминлашга эришди.
Уй олдига тикилган қора уй. Унинг ичида ота-боболаримиздан мерос бўлиб келаётган буюмлар, миллий кийимлар, кўрган кўзни қувонтиради. Бу ажойиб қўл меҳнатларини келажак авлодга етказиш мақсадида ҳунарманд кооперация очишни ҳам мақсад қилган. Демак, яратилган имкониятлар фаровон ҳаётга, яхши яшашга, янги ҳаётга қадам бўлиб хизмат қилмоқда.
Мақсад ҲАБИБУЛЛАЕВ (сурат ва видео), ЎзА