Búgin, 13-mart kúni Bishkek qalasında Qırǵızstan basshısı Sadir Japarov Tájikstan prezidenti Еmomali Rahmon menen shegara haqqındaǵı kelisimge qol qoydı.

Shártnamaǵa bola, eki mámleket teń bahaǵa iye bolǵan tartıslı aymaqlar menen almasqan hám shegaranı anıq belgilew boyınsha kelisimge erisken. Bul shegaranıń uzınlıǵı 980 km bolıp, sóylesiwler 2002-jıldan beri alıp barılǵan. Bul másele kóp qarama-qarsılıqlarǵa hám jergilikli xalıq hám áskerler arasında soqlıǵısıwlarǵa sebepshi bolǵan.
«Búgin biz ellerimiz arasındaǵı shegara boyınsha tariyxıy qarar qabıl etip atırmız»,-dedi Еmomali Rahmon.
Sonday-aq, Tájikstan hám Qırǵızstan óz-ara hawa qatnawın tiklew boyınsha da kelisimge erisken.
Eki mámleket arasındaǵı shegara tartıslar sebepli 2021-jılda jabılǵan hawa qatnawları bıyıl 14-mart kúninen baslap qayta tiklenedi. Málim etiliwinshe, hawa qatnawları «Dushanbe-Bishkek» hám «Bishkek – Xojent» jónelislerinle shólkemlestiriledi.
Bunnan tısqarı, shegaralas aymaqlarında avtobus qatnawlarınıń da jolǵa qoyılıp atırǵanı málim etildi.

Qaraqalpaqstan xabar agentligi