“Taiwan Semiconductor Manufacturing Co” (TSMC) томонидан АҚШда микрочиплар ишлаб чиқариш учун қурилажак заводларга жалб қилинаётган 100 миллиард долларлик сармоя Қўшма Штатларга дунёдаги микрочип бозорининг қарийб 40 фоизини назорат қилиш имконини беради. Бу ҳақда мамлакат президенти Дональд Трамп баёнот берди.

– Илгари “Intel” билан катта улушга эга эдик, лекин ҳозир бизда жуда кам нарса бор ва ушбу битим ҳамда амалга оширилаётган яна бир нечта шартнома орқали микрочип бозорининг 40 фоизига эга бўламиз, -деди Оқ уй раҳбари.

Маълумот ўрнида: “TSMC” дунёдаги энг йирик чип ишлаб чиқарувчи компания ҳисобланади. Компания  2020йилда АҚШ иқтисодиётига илк сармоясини киритиб, Аризонада 12 миллиард долларлик завод қурди. Шундан сўнг,“TSMC” ўз тармоғини кенгайтириб,  яна иккита заводни қўшди ва сармоя ҳажмини 65 миллиард долларга етказди. Ўтган йилнинг охирида мазкур заводларда маҳсулот ишлаб чиқариш бошланган.

“The Wall Street Journal” нашрининг ёзишича, “TSMC”нинг чиплари сунъий интеллект технологиялари, смартфонлар ва бошқа илғор электроника маҳсулотлари учун жуда муҳим ҳисобланади.

С.Раҳимов, ЎзА