Президент Владимир Зеленский сешанба куни АҚШ Украинага ҳарбий ёрдам тўхтатилганини эълон қилгандан бир неча соат ўтиб, Оқ уйда Дональд Трамп билан бўлган қизғин суҳбат “афсусланарли” кечгани ва “буни тузатиш вақти келгани”ни, айтди.

– Жума куни Вашингтондаги учрашувимиз кутилгандек ўтмади, – деган у. – Шундай бўлгани жуда ачинарли. Ҳаммасини тузатиш вақти келди. Келгуси ҳамкорлик ва мулоқот самарали бўлишини истардик.

Ўша қизғин фикр алмашишдан сўнг Америка етакчиси Украина билан келишув муҳокамадан ташқаридалигини билдирди. Сешанба куни эса Зеленский Киев Трамп маъмурияти хоҳлаётган ноёб ер минераллари бўйича келишувни имзолашга тайёрлигини билдирди. Бу хабарни “Euro News” тарқатган.
– Минерал қазилмалар ва хавфсизлик бўйича келишувга эришсак, Украина ҳужжатни қулай вақт, форматда имзолашга тайёр, – деган Зеленский.
– Мазкур келишувни янада мустаҳкамроқ ва ишончли хавфсизлик кафолати сари қадам, деб биламиз. Ташаббус самарали ишлашига чин дилдан умид қиламан.
Зеленский билан баҳсли учрашувдан бир неча кун ўтиб, Трамп Россия билан тинчлик музокарасига киришиши учун Киевга босим ўтказиш мақсадида Украинага ҳарбий ёрдамни тўхтатиш ҳақида қарор чиқарди.

Киев расмийлари Россия билан тўртинчи йил давом этаётган кенг кўламли уруш давомида кўрсатган ҳаётий ёрдами учун Қўшма Штатлардан миннатдорлиги, Вашингтон билан ҳамкорликни давом эттириш истагида эканини билдирган.

Афсуски, Украина ва иттифоқчилар Трамп, сулҳга риоя қилишига ишониб бўлмайдиган Россия фойдасига, тезда ўт очишни тўхтатишга интилаётганидан хавотирда.
Оқ уй матбуот котиби таъкидлашича, АҚШ ечимга ҳисса қўшишини таъминлаш учун ёрдамни тўхтатиб, вазиятни ўрганмоқда.

М.Пирматова, ЎзА