Буюк Британия Бош вазири Кей Стармер “Украина билан урушни тугатиш ва мамлакатни Россиядан ҳимоя қилиш” учун тўрт банддан иборат режа эълон қилди, деб ёзди BBC.

Қироллик ҳукумати етакчиси фикрига кўра, Буюк Британия ва Франция бошчилигидаги давлатлар “хоҳловчилар коалицияси” доирасида саъй-ҳаракатни кучайтиради, АҚШ Украинани қўллаб-қувватлашга чақирилади.

– Бугун тарих чорраҳасида турибмиз, – деди Стармер кўҳна қитъанинг 18 давлати етакчиси ва Украина Президенти Владимир Зеленский иштирок этган саммитдан сўнг. Мазкур анжуман Украина кучли қўллаб-қувватланишни ҳис қилгани, Европа бирлигини узоқ вақт давомида юқори даражада ушлаб туриш мумкинлигини кўрсатди.

Бу воқеа Оқ уйда бўлиб ўтган Украина раҳбари ва АҚШ Президенти Дональд Трамп ўртасидаги қизғин суҳбатдан икки кун ўтиб содир бўлди.

– Европада ҳақиқий тинчлик ва кафолатланган хавфсизлик ўрнатиш йўлида Америка билан ҳамкорлик қилишга асос топиш учун ҳаммамиз бирга ишлаяпмиз, – деди Зеленский анжумандан кейин.

Матбуот анжуманида Стармер тадбирда тўрт асосий йўналиш бўйича келишилганини билдирди:

– Украинага ҳарбий ёрдам оқимини давом эттириш ва РФга иқтисодий босимни кучайтириш;

– барқарор тинчлик Украина суверенитети ва хавфсизлигини таъминлаши, бу давлат ҳар қандай тинчлик музокарасида иштирок этиши шартлиги;

– тинчлик келишувига эришилган тақдирда, келажакда босқиннинг олдини олиш учун Украина мудофаа қобилиятини ошириш;

– Украинадаги келишувни ҳимоя қилиш ва кейинги тинчликни кафолатлаш учун “Хоҳловчилар коалицияси”ни тузиш.

Британия Бош вазири, шунингдек, 5 000 дан ортиқ ҳаво мудофааси ракетаси сотиб олиш учун қўшимча 2 миллиард доллар ажратилишини маълум қилди. Бу Россиянинг музлатилган активларидан тушган фойда ҳисобидан қўллаб-қувватланадиган, Украинага кўпроқ ҳарбий ёрдам кўрсатиш учун белгиланган 2,2 миллиард фунт стерлинг кредитга тўғри келади.

Мусулмон Зиё, ЎзА