Дональд Трамп қудратли мамлакатнинг кучли президенти эканлигини исботлай олмади. Украинанинг қимматли ер минераллари билан андормон бўлиб юрган Трамп жума куни Украина раҳбари Владимир Зеленскийни Оқ уйда қабул қилди. Сиёсатчилар фойдали қазилмалар бўйича битим имзолаши, ундан сўнг урушни тўхтатиш ҳаракатлари бошланиши керак эди. Трамп фақатгина ўт очишни тўхтатишга ваъда берган, Зеленскийга эса хавфсизлик кафолатлари керак. Чунки у Путиннинг қилиқларини билади, у куч тўплаб хоҳлаган пайт уруш очиши мумкин.

Шундан сўнг Оқ уда Зеленский, Трамп ва унинг вице-президенти Венс ўртасида даҳанаки жанг кетган. Кадрларда кўринадики, музокаралар соғлом ва дипломатик руҳда ўтмаган. Зеленскийга босим ўтказилган. Ҳатто унга журналистлардан бири нега костюм-шим киймаганлигини сўраган. Трамп Зеленскийга кучли позицияда эмаслигини бир неча бор баланд овозда айтди. Шундай қилиб Украина лидери муддатидан олдин Оқ уйни тарк этган ва сиёсатчилар ўртасидаги матбуот анжумани қолдирилган.

“У Оқ уйнинг муқаддас Овал кабинетида АҚШга нисбатан ҳурмасизлик қилди. У тинчликка тайёр бўлганда қайтиб келиши мумкин», – деган Трамп “Truth Social” ижтимоий тармоғида.

«Раҳмат, Америка. Президент, Конгресс ва Америка халқига раҳмат. Украинага адолатли ва узоқ муддатли тинчлик керак. Биз бу ҳаракатимиздан тўхтамаймиз», – деб ёзган Зеленский ижтимоий тармоқлардаги саҳифасида.

Оқ уйдаги воқеадан кейин кўплаб Ғарб давлатлари Украинани қўллаб-қувватлашини айтган ва Зеленский билан телефон орқали мулоқотда бўлган.

Учрашувдан кейин, Зеленский Fox News телеканалига интервю бергани маълум. Унинг айтишича, Киевга хавфсизлик кафолати керак. Украинани НАТОга қабул қилишмаса, мажбурлаш йўқ. Керак бўлса, Украинада НАТО тузишади. Трамп эса Зеленский ўзига катта баҳо бериб юборганини таъкидлаган.

Қўшма Штатлардан кейин Зеленский Буюк Британияга йўл олган. 2 март куни Европа давлатларининг учрашуви бўлиб ўтади.

Европа ҳам Трампни Путинга ишонмасликка чақирмоқда. Ўтаётган ҳафта Франция президенти Эммануэль Макрон ва Буюк Британия Бош вазири Кей Стармер ҳам Вашингтонда бўлиб қайтди.

“Буюк Британияда Иккинчи жаҳон урушидан кейин бир одат шаклланган. Биз тинчликни таъминлашимиз керак ва бунинг ҳозир айни вақти. Тажовузкорларни олқишлайдиганлардан эмасмиз”, — деган Стармер.

Макрон Трампга Россия раҳбари билан битим тузишнинг иложи йўқлигини ишонтиришга ҳаракат қилган. Макрон Украинадаги уруш бошланишидан олдин Путин билан 7 соатлаб гаплашганини, ҳар қандай тажовузни рад этиб, охири Украинага уруш очганини айтиб берар экан, Трампга Путиннинг виждонига ишониш учун ҳеч қандай сабаб йўқлигини эслатган.

Франция ва Буюк Британия келишувга эришилгандан сўнг Украинага тинчликпарвар кучларни жойлаштиришга тайёрлигини айтишган. Фақат бу йўлда АҚШнинг мадади керак бўлади. Чунки логистика ва ракеталарга қарши самолётлар соҳасида Ғарб ёрдамга муҳтож.

Саудия Арабистонидаги учрашувдан кейин ўтган пайшанба куни Истанбулда Россия ва АҚШ сиёсатчиларининг иккинчи учрашуви бўлиб ўтди. Томонлар турли хил тўсиқларни олиб ташлаш, тўғридан-тўғри ҳаво йўллари қатновини тиклаш борасида гаплашган.

Ғазодаги вазият

Ўтаётган ҳафтада ҲАМАС гаровга олинган ва ҳалок бўлган тўрт нафар аскарни топширгандан сўнг Исроил  600 нафардан кўп фаластинлик маҳбусларни қўйиб юборган. Миср воситачилари ёрдамида Исроилга етказилган марҳумлар шахсига аниқлик киритилган.

Тинчлик келишуви муддати 1 мартга қадар эди. 27 феврал куни Қоҳирада воситачилар ва Исроилнинг жараённи узайтириш бўйича йиғилишида Тел-Авив иккинчи босқичга ўтишга рози бўлмаган. Фаластин вакили қачонки тўлиқ келишувга эришилса, асирларни озод қилишини айтган.

Шунингдек, Ғазода 15 ойдан кейин биринчи марта мактаб яна ўқувчиларни қабул қилди. Ушбу мактабда 300 дан ортиқ ўқувчи янги ўқув йилини бошлаган. 2023 йил октябр ойида Фаластин-Исроил можароси авж олган вақтда анклавдаги мактабларнинг аксарияти Исроил ҳаво ҳужумлари натижасида вайрон бўлган, кўплаб болали оилалар уйларини ташлаб, қочқинга айланганди.

Шунингдек, фаластинликлар муқаддас Рамазон ойини кутиб олишди. Жума куни Ал-Ақсо масжидида биринчи таровеҳ намозини ўқишган.

Ҳимолайда қор кўчди

Ҳиндистоннинг Ҳимолай тоғи тепасидан кўчган улкан қор бўлаги яқин ҳудудда йўлни таъмирлаётган одамларни босиб қолди. Бу ҳақда “Daily Express” хабар берган. Фожеадан сўнг дастлабки дақиқаларда 41 инсон ҳаётдан кўз юмгани тахмин қилинган.

Ҳодиса ҳар йили юз минглаб зиёратчи ташриф буюрадиган Бадринатҳ ибодатхонаси ёнида содир бўлди.

Сўнгги маълумотга кўра, кўчки Гархвал туманидаги Умумий захира муҳандислик кучлари қўналғасига ҳам зарар етказган.

– Дастлаб 57 киши қор остида қолиб кетди, – дейди маҳаллий полиция ходими. – Қутқарувчилар 16 кишини қутқаришга эришди. Уларнинг беш нафари оғир аҳволда ҳарбий тиббиёт муассасасида даволаняпти.

150 ҳарбий хизматчи тирик қолганларни излашда махсус гуруҳга ёрдам беряпти. Мансабдор шахслар фикрича, ноқулай об-ҳаво шароити қутқарув ишига тўсқинлик қиляпти.

– Кучли ёмғир туфайли ҳаракатланиш қийин кечяпти, – дейди Чамоли тумани ҳокими Сандип Тивари. – Мутахассислар ва кўнгиллилар астойдил меҳнат қилишяпти.

Сардорбек Поёнов, Дониёр Ёқубов, Анвархўжа Аҳмедов (видео), ЎзА.