Хитойнинг “Alibaba Group” интернет-компанияси сунъий интеллект учун аппарат инфратузилмасини яратишга 380 миллиард юандан (тахминан 53 миллиард доллар) кўпроқ сармоя киритади, дея хабар тарқатди “Синхуа” ахборот агентлиги.

Хитойнинг “Пэнпай” нашри “Alibaba”нинг ушбу инвестицияси мамлакат хусусий корхоналарининг сунъий интеллект инфратузилмасини яратишга киритган сармоялари ҳажми бўйича рекорд эканлигини таъкидлади.

Нашрнинг ёзишича, “Alibaba”нинг инвестиция бўйича қарори икки муҳим омил асосида қабул қилинган. Улардан бири Хитойда сунъий интеллект саноати жуда тез суръатда ўсаётгани бўлса, иккинчиси февралда бўлиб ўтган ҳукумат вакиллари, жумладан, ХХР Раиси Си Цзиньпин ва мамлакатнинг йирик хусусий компаниялар раҳбарлари  иштирок этган хусусий тадбиркорликни ривожлантириш бўйича анжуман ҳисобланади.

Январь ойи охирида “Alibaba Cloud” янги сунъий интеллект тили – “Qwen 2.5-Max” моделини тақдим этди, ишланма муаллифларининг таъкидлашича, ушбу модель имкониятлари бўйича “DeepSeek” компаниясининг моделидан устун туради.

С.Раҳимов, ЎзА