Хитойда 20 ёшгача бўлган футболчилар ўртасида ўтаётган Осиё кубогида чорак финал баҳслари якунланди. Аниқроқ айтадиган бўлсак, кубок беллашувларининг чорак финалида Ўзбекистон – Корея Республикаси ёшлар терма жамоалари ўзаро куч синашди.

Учрашувда футболчиларимиз ўйиндаги ҳисобни очган бўлса, кореялик футболчилар ўйин давомида кетма-кет учта гол уриб олдинга чиқиб олди. Бироқ асосий вақтнинг сўнгги дақиқаларида футболчиларимиз ўйин тизгинини қўлга олди ва ҳисобни 3:3 кўринишига олиб келди. Ўйинда жамоамиз голларига Асилбек Жумаев, Абдуғафур Ҳайдаров,Муҳаммадали Ўринбоев муаллифлик қилди.

Терма жамоамизнинг ажойиб камбэкидан сўнг, экстра таймларда ҳисоб очилмагани боис жамоалар футбол лотореясига таклиф этилди.

Пенальтилар сериясида афсуски, футболчиларимиз 3:1 ҳисобида енгилди.

Шунингдек, бугунги баҳсларда Эрон ва Япония терма жамоалари ярим финал остонасида ўзаро тўқнаш келди. Унда асосий вақт 1:1 ҳисобида якунланди. Пенальтилар сериясида япониялик футболчилар 4:3 ҳисобида зафар қучди.

Шу тариқа, мазкур қитъа кубоги 1/2 финал босқичида Корея Республикаси – Саудия Арабистони, Япония – Австралия терма жамоалари беллашади. Ярим финал ўйинлари 26 февраль куни бўлиб ўтади.

Маълумот ўрнида: Корея Республикаси, Саудия Арабистони, Япония ва Австралия ёшлар терма жамоалари 27 сентябрь – 19 октябрь кунлари Чили мамлакатида ўтадиган жаҳон чемпионатида иштирок этади.

Жавоҳир Тошхўжаев, ЎзА