Президент Владимир Зеленский дастлабки таклифни рад этгандан сўнг, АҚШ етакчиси Дональд Трамп маъмурияти Украинага минерал ресурслар билан боғлиқ қайта кўриб чиқилган келишув лойиҳасини топширди, деб ёзди “Axios” портали.

Зеленскийнинг ёрдамчилари Трамп билан навбатдаги зиддият юзага келишининг олдини олиш мақсадида мазкур янги таклифга имзо чекишни сўрамоқда.

– Охирги лойиҳа сезиларли даражада такомиллаштирилган, Украина қонунчилигига мос келади, – дейилган ахборотда.

Ҳар икки томон манбалари келишув эҳтимоли ортиб бораётганини маълум қилган.

3 февраль куни Трамп Вашингтон Киевдан молиявий ва ҳарбий ёрдам эвазига ер ости нодир металлари етказиб бериш кафолатини кутаётгани ҳақида гапирганди.

“Вашингтон Пост” Конгресс аъзоларига таяниб, 14 февраль куни америкалик амалдорлар Зеленский билан Мюнхендаги учрашувда унга Украинадаги ҳали қазиб олинмаган минерал ресурсларнинг 50 фоизига бўлган ҳуқуқни АҚШга ўтказиш назарда тутиладиган ҳужжат имзолашни таклиф қилгани ҳақида хабар тарқатган эди. Украина раҳбари эса эртасига бундай шартнома тасдиқланмаганини билдирди.