Президент Шавкат Мирзиёев 14 февраль куни ёшлар билан мулоқот қилганида фарзандларимиз учун имкониятларни янада кенгайтиришга алоҳида эътибор қаратди.

Олий Мажлис Сенатининг тўртинчи ялпи мажлисида ёшлар масаласига эътибор қаратилиб, шу йўналишда қўйилаётган вазифалар ижросида парламентнинг ўзига хос ўрни борлиги қайд этилди.

Сенат Раиси Танзила Норбоева ёшларга янги имкониятлар яратиш, уларнинг муаммоларини аниқлаш ва ҳал қилиш юқори палатанинг доимий эътиборида эканини таъкидлади. Айнан шу мақсадда Сенат ҳузурида Ёшлар парламенти ташкил этилган. Улар ёшлар ҳуқуқларига оид меъёрлар такомиллаштирилиши, ёшлар ҳаётига дахлдор масалалар ечими бўйича изчил фаолият юритмоқда.

– Яқинда ёшлар парламентининг биринчи мажлиси бўлиб ўтди, унда Лайло Аслонова ушбу тузилманинг раиси этиб сайланди, – деди Т.Норбоева. – Биз ёш ҳамкасбларимиз билан олдимизда турган устувор вазифалар, биргаликда эътибор қаратишимиз лозим бўлган муҳим йўналишларни атрофлича муҳокама қилиб олдик. Хусусан, қонун ижодкорлиги жараёнида фаол иштирок этиш, айниқса ёшлар билан мунтазам мулоқот қилиб, уларнинг муаммоларини аниқлаш (бандлик, тадбиркорлик, таълим ва ҳ.к.), тизимли таҳлил қилиш ва бартараф этиш бўйича қонунчилик таклифларини шакллантиришга алоҳида эътибор қаратиш зарур.

Ёшлар парламенти аъзолари айни пайтда халқ депутатлари эканидан келиб чиқиб, Сенат ва маҳаллий кенгашларнинг узвий ҳамкорлигини таъминлаш, парламент назорати тартибида биргаликда ўрганишлар, тадқиқот ва таҳлиллар ўтказиш, ҳудудлар манфаатларига доир асосланган таклиф ва ташаббусларни илгари суришда фаоллик кўрсатади.

Қўмита ва комиссиялар ўз фаолиятида Ёшлар парламенти билан амалий ҳамкорликни йўлга қўяди. Иш режаларини шакллантиришда уларнинг ҳам таклифларини инобатга олади. Ҳудудларда бўладиган парламент назорати тадбирларига, шунингдек, халқаро парламентлараро мулоқотлар (ташрифлар, анжуманлар)га Ёшлар парламентининг жойлардаги аъзоларини фаол жалб қилади. Тегишли соҳа ва йўналишларни ривожлантириш масалаларида Ёшлар парламенти аъзоларининг ғоя ва ташаббуслари эътиборга олинади.

Н.Абдураимова,

ЎзА