Кеча Европа чемпионлар лигасининг плей-офф жавоб ўйинлари ўз ниҳоясига етди. Тунда ўтказилган тўрт учрашув орасида энг кутилгани “Реал Мадрид” — “Манчестер Сити” клублари баҳси бўлди ва ўйин 3:1 ҳисобида якунланди. Учрашувда “Реал Мадрид” ҳужумчиси Килиан Мбаппе хет-трикка эришган бўлса, сўнгги дақиқаларда Нико Гонсалес “МС”нинг ягона голига муаллифлик қилди. Шу тариқа “Қироллик клуби” икки ўйин натижасига кўра, 6:3 ҳисобида ғалаба қозониб, 1/8 финал босқичига йўл олди.

Юртимизда “Реал Мадрид”нинг мухлислари кўпчиликни ташкил қилса-да, “Манчестер Сити” таркибида Миллий терма жамоамиз аъзоси ҳисобланган Абдуқодир Ҳусанов борлиги барча ватандошларимизни ушбу клубга мухлислик қилишга чорламоқда.

УЕФАнинг энг нуфузли турнири – Чемпионлар лигаси бу мавсум янги форматда ўтказилмоқда. Ушбу турнирда иштирок этган ягона ўзбек футболчиси – Абдуқодир Ҳусанов илк бор Европа чемпионлар лигасининг плей-офф босқичида ўйнади. Бу, 20 ёшли ҳимоячимизнинг “Манчестер Сити” сафида халқаро миқёсдаги дебюти бўлди.

Шунингдек, Абдуқодир яна бир тарихий натижа қайд этди. Аниқроқ айтадиган бўлсак, футболчимиз Чемпионлар лигаси плей-офф босқичида “Реал”га қарши ўйинда дебют қилган иккинчи энг ёш ўйинчи бўлди. Беллашув ўтказилган санада легионеримиз 20 ёшу 356 кунлик эди. Аввалги рекорд 2014 йил ўрнатилган бўлиб, “Шальке” футболчиси Каан Айхан 19 ёшу 128 кунлигида “Реал”нинг уй стадионида майдонга тушган.

Таъкидлаш жоизки, Абдуқодир Ҳусанов учрашув давомида мухлислар кутганидек Винисиус Жуниорга гол уриш имконини бермади. Аммо қолган жамоадошлари Килиан Мбаппега қаршилик кўрсатишда ожиз қолди. Тўғри, иккинчи голда бироз Абдуқодирнинг айби бордек кўриниши мумкин. Аммо, тезкор ҳужумда у иккита тажрибали ўйинчига қарши яккаланиб қолганига барчамиз гувоҳ бўлдик. Умуман олганда ўзбек ўғлони дебют учрашув учун яхши ўйин намойиш эта олди.

Эслатиб ўтамиз, Абдуқодир Ҳусанов 20 январь куни “Манчестер Сити”га кўчиб ўтганидан бери учта нуфузли мусобақа – Англия Премьер-лигаси, мамлакат кубоги ва Европа чемпионлар лигаси плей-оффида дебют қилган ягона ўзбек футболчиси сифатида тарихда қолди.

Дарвоқе, ушбу беллашув давомида ҳамюртимиз Абдуқодир Ҳусанов тўлиқ ҳаракат қилди ва “Sofascore” портали томонидан 6.8 баллга лойиқ кўрилди.

Қуйида унинг мазкур ўйинда қайд этган статистикаси билан танишасиз:

Тўпни узоқлаштириш – 3;

Паслар – 53/57 (93%);

Кесиб ўтувчи узатма – 1;

Якка курашлардаги устунлик – 2/4;

Тўпни йўқотиш – 6;

Қоидабузарлик – 1;

Зарбалар – 1/1;

Дриблинг – 1/1;

Тўпни тортиб олиш – 1;

Чемпионлар лигасининг қўшимча плей-офф босқичидан ўрин олган “ПСВ” — “Ювентус” баҳси қизиқарли ўтди. Асосий вақтда икки ўйин натижасига кўра кучлар тенг келгани боис, қўшимча бўлимга мурожаат қилинди. Унда мезбонлар вакили Фламинго гол уриб, “ПСВ”нинг ғалабасини таъминлади.

“ПСЖ” эса “Брест”ни қабул қилиб, рақиб дарвозасини жавобсиз 7 бор ишғол қилди. Мазкур ўйиндан сўнг “ПСЖ” икки ўйин натижасига кўра 10:0 ҳисобида зафар қучди. “Боруссия Дортмунд” — “Спортинг” ўйинида ҳисоб очилмади. Ушбу қарама-қаршиликнинг илк ўйинида Германия клуби 3:0 ҳисобида зафар қучгани сабабли нимчорак финалга чиқди.

Мусобақанинг плей-офф босқичидан “Боруссия Д” (Германия),“Реал” (Испания), “Бавария” (Германия), “ПСВ” (Нидерландия), “ПСЖ” (Франция), “Бенфика” (Португалия), “Фейеноорд” (Нидерландия) ва “Брюгге” (Бельгия) клублари муваффақиятли ўтди.

Нимчорак финалда 1-8-ўринни эгаллаган жамоаларга тушиш эҳтимоли мумкин бўлган клублар:

“Ливерпуль” / “Барселона” – “ПСЖ”/“Бенфика”,

“Арсенал” / “Интер” –“ПСВ”/ “Фейеноорд”

“Атлетико” / “Байер” – “Реал”/ “Бавария”,

“Лилль” / “Астон Вилла” – Боруссия”/“Брюгге”.

Маълумот ўрнида: Европа чемпионлар лигаси 2024/25 мавсумининг 1/8, 1/4 ва 1/2 финал босқичлари учун қуръа ташлаш маросими 21 февраль куни Ньон шаҳрида бўлиб ўтади. Маросим Тошкент вақти билан 16:00да бошланади. Мусобақанинг 1/8 финал босқичи 4 – 5 ва 11 – 12 март кунлари бўлиб ўтади.

Жавоҳир Тошхўжаев,

ЎзА