АҚШ Давлат котиби Марко Рубио Вашингтоннинг европалик иттифоқчиларига Президент Дональд Трамп маъмурияти, ҳеч бўлмаганда РФ – Украина можаросини ҳал этиш бўйича келишувга эришилгунга қадар, Россияга қарши санкцияни сақлаб қолишини айтган. Бу ҳақда “Блумберг” агентлиги хабар тарқатган.

Нашр таъкидлашича, Рубио бу режани сешанба куни европалик ҳамкасблари билан телефон суҳбати чоғида ошкор қилган. Сўзлашув Ар-Риёдда Россия вакиллари билан кечган музокарадан сўнг бўлиб ўтган.

4 ярим соат давом этган АҚШ – РФ мулоқотида икки томонлама муносабат, Украинадаги вазиятни тартибга солиш ва давлат раҳбарлари учрашувига тайёргарлик кўриш масалалари муҳокама қилинган.

АҚШ Президенти Дональд Трамп мазкур учрашувни “жуда яхши” баҳолаган ва Россия – Украина зиддиятини бартараф қилиш тўғрисида келишувга эришиш мумкинлигига “ишончи янада ортганини” билдирган.

АҚШ ва Россия етакчилари ўтган ҳафта телефон орқали мулоқот қилиб, ўзаро фуқароларни алмашиш, шунингдек Украинага қарши ҳарбий ҳаракатни тўхтатиш мавзуларини муҳокама қилган эди. Суҳбатдан сўнг на Кремль ва на Оқ уй бўлажак музокарада Европа ёки Украинанинг иштирокига тўхталмаган.