АҚШ разведкаси Эроннинг ядровий объектларига зарба берилиши мумкинлигидан огоҳлантирди, деб ёзди “Wall Street Journal” расмийларга таяниб.

Нашр ёзишича, Президент Жо Байден маъмуриятининг сўнгги кунлари АҚШ махсус хизмати Исроил рақибининг “заифлиги”дан фойдаланиб, 2025 йил Эрон ядро иншоотларига кенг кўламли зарба бериш имкониятини кўриб чиқаётгани ҳақида хулоса чиқарган.

Разведка маълумотлари билан таниш икки киши Исроил Дональд Трамп маъмуриятини ҳужумни қўллаб-қувватлашга ундайди, деган хулосага келган. Улар Трамп Эроннинг ядровий қуролга эга бўлишга уринишини тўхтатиш йўллари қолмаётганидан қўрқиб, буни Байдендан кўра кўпроқ хоҳлашига ишонади.

– АҚШ разведка ҳамжамияти Трамп маъмуриятининг дастлабки кунларидаги иккинчи ҳисоботини эълон қилди, – дея қўшимча қилган мақола муаллифи. – Ҳужжатда Исроил Эрон ядро объектларига зарба бериш масаласини кўриб чиқаётгани эслатилган. Америка ҳарбийлари Исроил кучли ҳимояланган ва мустаҳкамланган ядро объектларига ҳужум қилиш учун Вашингтоннинг ҳарбий ёрдами ва ўқ-дориси керак бўлиши мумкинлигини таъкидлаган.

Президент Трамп 5 февраль куни Эрон билан ядровий тинчлик келишувига эришмоқчилигини айтганди. У мазкур битим Эронга тинч йўл билан ривожланиши ва гуллаб-яшнаш имконини беришини қайд этиб, иккинчи томонни зудлик билан иш бошлашга чақирган. Эрон Ташқи ишлар вазирлиги Вашингтоннинг “Теҳрон ядровий қурол яратишга интилмоқда”, дея бераётган баёнотини ёлғон деб атаган.