Буюк Британия, Франция ва Германия етакчилари Украина келажаги бўйича мунозарада ўзларининг иштироки муҳимлигини таъкидламоқда, деб ёзди BBC.
Кўҳна қитъанинг етти давлати ташқи ишлар вазирлари ва Европа Комиссиясининг кеча Парижда бўлиб ўтган учрашувидан сўнг қуйидаги Қўшма баёнот эълон қилинган:
– Украинага ёрдамни кучайтиришга тайёрмиз. Россиянинг босқинчилик уруши асносида ушбу давлат мустақиллиги, суверенитети ва ҳудудий яхлитлиги таъминланиши керак, деган фикрда собитмиз. Ҳамкоримизни адолатли, кенг қамровли ва мустаҳкам тинчликка эришилгунга қадар қўллаб-қувватлашда давом этамиз. Тинчликка эришсак, Украина ва бизнинг манфаатимиз кафолатланади. Америкалик иттифоқчилар билан бирга ушбу масала муҳокама қилинишини сабрсизлик билан кутяпмиз. Украинани кучайтириш умумий мақсадга айланиши зарур. Украина ва Европа ҳар қандай музокарада иштирок этиши шарт. Украина кучли хавфсизлик кафолати билан таъминланиши лозим. Адолатли ва мустаҳкам тинчлик кучли трансатлантик хавфсизликнинг зарур шартидир. Эслатиб ўтамиз, қитъа хавфсизлиги умумий масъулиятимиздир. Шунинг учун жамоавий мудофаа қобилиятини мустаҳкамлаш учун бирга ҳаракатланамиз.
Мазкур баёнот Дональд Трамп Владимир Путин билан урушни “зудлик билан” тугатиш бўйича музокара бошлашга келишиб олганини айтгандан кейин янгради.
Кеча АҚШ Мудофаа вазири Пит Хегсет Украинанинг 2014 йилдан олдинги чегараларига қайтиши “эҳтимоли йўқ” мазмунида фикр бирлидрганди.
Мусулмон Зиё, ЎзА