Шимолий Корея давлат матбуоти АҚШ Президенти Дональд Трампнинг фаластинликларни кўчириш таклифини қоралаб, Вашингтонни талончиликда айблади, деб ёзди “Reuters”.

– Фаластинликларнинг хавфсизлик ва тинчликка бўлган умиди бу таклиф билан пучга чиқмоқда, – дея таъкидлаган манба. – Дунё ҳозир АҚШнинг бомбали декларацияси туфайли бўтқа пиширилаётган қозондек қайнаяпти.

Шарҳ Трампнинг Ғазо аҳолисини кўчириш ва урушдан вайрон бўлган ҳудудни “Яқин Шарқ Ривьераси”га айлантиришни режа қилаётгани ҳақидаги кутилмаган баёнотига қарши қаратилган.

КХДР Америка маъмуриятини Панама канали ва Гренландияни сотиб олиш чақириғи ва Мексика кўрфази номини “Америка кўрфази”га ўзгартириш қарори учун ҳам танқид қилган.

– АҚШ хом хаёлидан чекиниши, бошқа мамлакат ва халқлар қадр-қиммати ҳамда суверенитетига нисбатан тажовузкор ҳаракатини дарҳол тўхтатиши керак, дейилган КХДР ҳисоботида.

Трамп ўзининг биринчи муддатида Шимолий Корея етакчиси Ким Чен Ин билан тарихий саммитлар ўтказиб, ҳатто ўзаро шахсий муносабат ҳам ўрнатган эди.

Халқаро масалаларда асосан Ғарб қарашларига зид фикр юритадиган КХДР раҳбари Ғазодаги вазият ҳақида ҳам очиқ гапириб, қон тўкилишида “Исроилни жавобгар, АҚШни эса “шерик” деб атади.

Мусулмон Зиё, ЎзА