Футбол бўйича Европанинг энг кучли бешта чемпионати доирасида мамлакат кубоги баҳслари бўлиб ўтмоқда.

Жумладан, Англия лига кубогининг ярим финалидан ўрин олган «Ньюкасл» — «Арсенал» баҳсида мезбонлар 2:0 ҳисобида ғалаба қозонди ва финал босқичига йўл олди. Эслатиб ўтамиз жамоаларнинг биринчи ўйинида ҳам “Ньюкасл” айнан шу ҳисоб билан сафарда ғолиб бўлган эди.

Бугун тунда «Ливерпуль» ўз майдонида «Тоттенхэм»ни қабул қилади. Бу жамоаларнинг илк ўйинида “Тоттенхэм” 1:0 ҳисобида зафар қучган эди.

Италия кубогида эса чорак финал учрашувлари ўтказилди. Унда “Рома“ сафарда “Милан“ меҳмони бўлди. Ушбу баҳс меҳмонлар фойдасига 3:1 ҳисобида якунланди. Ўйинда ҳамюртимиз Элдор Шомуродов асосий таркибда майдонга тушиб, иккинчи бўлимнинг илк дақиқасида алмаштирилди. Кубокда “Аталанта” ўз майдонида “Болонья” клубига 0:1 ҳисобида имкониятни бой бериб қўйди. Шу тариқа, “Милан” ва “Болонья” ярим финалга йўл олди.

Энди 26-27 февраль кунлари 1/4 финал босқичида “Интер” – “Лацио”, “Ювентус” – “Эмполи” жамоалари ўзаро тўқнаш келади.

Испания кубогининг чорак финалида «Леганес» ва «Реал» жамоалари ўзаро баҳслашди. “Қироллик клуби” меҳмонда 2:3 ҳисобидаги ғалабага эришди. Шунингдек, Мадрид шаҳрининг иккинчи клуби бўлган “Атлетико” ўз майдонида “Хетафе” устидан 5:0 ҳисобида зафар қучди.

Бугун, 6 февралдан 7 февралга ўтар кечаси “Реал Сосьедад” – “Осасуна”, “Валенсия” – “Барселона” жамоалари ярим финал йўлланмаси учун ўзаро куч синашади.

Германия кубоги баҳсларининг чорак финалида “Штутгарт” 1:0 ҳисобида “Аугсбург” клубидан устун келган бўлса, “Байер” ва “Кёльн” ўртасидаги ўйин 3:2 ҳисобида ўз ниҳоясига етди. 26-27 февраль кунлари “Арминия Билефельд” – “Вердер”, “РБ Лейпциг” – “Вольфсбург” жамоалари ярим финал йўлланмасига эга чиқиш учун рақобатлашади.

Жавоҳир Тошхўжаев,

ЎзА