Жорий йилнинг 14-16 февраль кунлари Тошкент қиличбозликнинг рапира йўналиши бўйича йилнинг илк нуфузли мусобақаси – ёшлар ўртасидаги жаҳон кубогига мезбонлик қилади.

Дунёнинг бир қатор етакчи давлатларидан маҳоратли спортчилар иштирок этадиган нуфузли мусобақа олдидан Миллий олимпия қўмитаси раҳбарияти Халқаро қиличбозлик федерацияси (FIE) ва Ўзбекистон қиличбозлик федерацияси бош котиби Гулнора Саидова билан жаҳон кубогини юқори савияда ўтказиш юзасидан олиб борилаётган тайёргарлик масалаларини муҳокама қилди.

Таъкидланганидек, бугунги кунга келиб, бўлажак мусобақада қатнашиш учун 15 давлатдан 69 нафар спортчи талабномаларни тақдим этган. Мулоқот давомида хорижий давлат терма жамоалари учун қулай шароитлар яратиш, турнирни белгиланган талаб даражасида ўтказиш бўйича қатор йўналишлар кўриб чиқилди.

Учрашув якунида 2027 йил пойтахтимизда қиличбозлик спорти бўйича катталар ўртасида ўтказиладиган жаҳон чемпионатига ҳозирдан ҳозирлик кўриш, Халқаро қиличбозлик федерацияси(FIE) билан янги лойиҳаларни йўлга қўйиш борасидаги режалар кўриб чиқилди.

Т.Рўзиев,

ЎзА