Президент Дональд Трамп кеча ҳар икки давлат раҳбари билан гаплашгач, Мексика ва Канадага нисбатан қўшимча тариф қўллаш бир ойга кечиктирилишини эълон қилди. Бу ҳақда CNN хабар тарқатди.

Олдинроқ Қўшма Штатлар етакчиси шимол ва жанубдаги қўшни мамлакатлардан кириб келадиган энергия маҳсулотларига 10 фоиз, қолган барча товарлар учун 25 фоиз, Хитойдан импортга ҳам янги 10 фоизлик бож жорий этилишини билдирган эди.

Мексика етакчиси ва Канада Бош вазири АҚШ билан чегарада хавфсизлик кучайтирилиши, умуман АҚШнинг мазкур ташаббусига муносиб ва “керакли жавоб” берилиши хусусидаги баёнотлари Трампни шошилмасликка ундаган бўлса ажаб эмас.

– Мен ҳозиргина Президент Клаудия Шейнбаум билан гаплашдим, – деб ёзди Трамп кеча ўз ижтимоий тармоғида. – Жуда дўстона суҳбатлашдик. У давлатларимизни ажратиб турувчи чегарага зудлик билан 10 000 аскар етказишга рози бўлди. Бу қўшин фентанил ва ноқонуний муҳожирларнинг мамлакатимизга кириб келишини тўхтатиш миссиясини бажаради.

Жастин Трюдо ҳам Канада чегара масаласига дахлдор, аввал эълон қилинган 1,3 миллиард доллар қийматга эга режа амалга оширилиши, картеллар террорчилар рўйхатига киритилиши бўйича мажбурият олишини билдирди.

Дам олиш кунлари Американинг уч энг йирик савдо ҳамкорига нисбатан фавқулодда тариф эълон қилиниши, ҳатто, Трампнинг баъзи тарафдорларида ҳам жиддий хавотир уйғотиб, иқтисодиётда шов-шув кўтарди, бизнес оламини ларзага келтирди.

Мутахассислар таъкидлашича, янги тарифлар билан боғлиқ ойиҳа амалга ошса, Канада ва Мексика иқтисодиёти тезда таназзулга учраши мумкин. Америкаликлар учун эса автомобиль, бензин, ёғоч ҳамда бошқа импорт қилинадиган маҳсулотлар нархи кескин кўтарилади.

Мусулмон Зиё, ЎзА